நூதன முறையில் பெண்ணிடமிருந்து தங்க நகைகளை கொள்ளையடித்து சென்ற மர்ம நபர்கள் குறித்து காவல்துறையினர் விசாரணை நடத்தி வருகின்றனர்.
சேலம் மாவட்டத்தில் உள்ள சீலநாயக்கன்பட்டி பகுதியில் வியாபாரியாக ஆறுமுகம் என்பவர் வசித்து வருகிறார். இவருக்கு சரஸ்வதி(55) என்ற மனைவி உள்ளார். நேற்று முன்தினம் சரஸ்வதியின் வீட்டிற்கு சென்ற 2 மர்ம நபர்கள் தோஷங்கள், காத்து, கருப்பு, பில்லி சூனியம் போன்ற பிரச்சனைகள் இருப்பதாக கூறியுள்ளனர். இதற்கான பரிகாரம் செய்தால் பணம், வருமானம் பெருகும் என அந்த நபர்கள் கூறியுள்ளனர் இதனை நம்பிய சரஸ்வதி வீட்டிற்குள் பூஜைகள் செய்ய அவர்களை அனுமதித்துள்ளார்.
இந்நிலையில் மர்ம நபர்கள் தாங்கள் கொண்டு சென்ற சொம்பில் தங்க நகைகளை கழற்றி போடுமாறு சரஸ்வதியிடம் தெரிவித்துள்ளனர். இதனை நம்பிய சரஸ்வதி 1 1/2 பவுன் தங்க நகைகளை கழற்றி பாத்திரத்தில் போட்டுள்ளார். பின்னர் மர்மநபர்கள் சாம்பிராணி புகை போட்டு கண்ணிமைக்கும் நேரத்தில் அங்கிருந்து தப்பி சென்றனர். இதனை பார்த்து அதிர்ச்சியடைந்த சரஸ்வதி காவல் நிலையத்தில் புகார் அளித்துள்ளார். அந்த புகாரின் பேரில் வழக்குப்பதிவு செய்த காவல்துறையினர் மர்ம நபர்களை தீவிரமாக தேடி வருகின்றனர்.