பள்ளிகளை வருமான நோக்கத்தோடு நடத்தக்கூடாது என முதல்வர் மு க ஸ்டாலின் தெரிவித்துள்ளார்.
சென்னையில் உள்ள குரு நானக் கல்லூரியின் 50வது ஆண்டு விழா இன்று நடைபெற்றது. இந்த விழாவில் சிறப்பு விருந்தினராக முதல்வர் மு க ஸ்டாலின் கலந்து கொண்டார். பின்னர் பேசிய அவர் தொற்று பாதிப்பால் என் தொண்டை பாதிக்கப்பட்டுள்ளது. தொண்டை பாதிக்கப்பட்டாலும் தொண்டு பாதிக்க கூடாது என்பதால் என் பணிகளை தொடர்ந்து செய்து வருகிறேன். சமீப காலமாக நடந்து வரும் நிகழ்வுகள் என்னை மன வேதனை அடைய செய்கின்றது. பள்ளி மாணவிகளுக்கு பாலியல் தொந்தரவு நடந்தால் கடுமையான நடவடிக்கை எடுக்கப்படும்.
மாணவிகளுக்கு மன உடல்ரீதியாக இழிவு செயல் நடந்தால் தமிழக அரசு வேடிக்கை பார்க்காது, குற்றவாளிகளை நிச்சயம் தண்டிக்கும். மாணவர்களுக்கு தற்கொலை என்ற எண்ணம் வரக்கூடாது. மாணவர்கள் உயிரை மாய்த்துக் கொள்ளும் சிந்தனைகளை கைவிட்டு உயிர்பிக்கும் சிந்தனைகளை மேற்கொள்ள வேண்டும். மாணவர்கள் தங்களின் ஆசிரியர்கள் மற்றும் பெற்றோரிடம் மனம் விட்டு பேச வேண்டும். படிப்போடு கல்வி முடிந்து விடுவதில்லை. பாடம் நடத்திய பிறகு ஆசிரியர் பணி முடிந்து விடாது. கல்வி நிறுவனம் நடத்துவோர் தொழில் வர்த்தகமாக இல்லாமல் தொண்டாக நினைத்து அதை செய்ய வேண்டும். பள்ளிகளை வருமான நோக்கத்தோடு நடத்தக்கூடாது என முதலமைச்சர் மு.க.ஸ்டாலின் அறிவுறுத்தியுள்ளார்.