மாணவர்கள் தினம்தோறும் ஆபத்தான பயணம் மேற்கொள்வதால் பள்ளி, கல்லூரி நிர்வாகத்துடன் ஆலோசனை மேற்கொண்டு விழிப்புணர்வை ஏற்படுத்த வேண்டும் என்று டிஜிபி சைலேந்திரபாபு உத்தரவு பிறப்பித்துள்ளார். இதுதொடர்பாக போலீஸ் உயர் அதிகாரிகளுக்கு அவர் அறிவித்துள்ள சுற்றறிக்கையில் தெரிவித்துள்ளதாவது: “பள்ளி ,கல்லூரி செல்லும் மாணவர்கள் தனியார் மற்றும் அரசு பேருந்துகளில் படிக்கட்டுகளில் தொங்கியபடி ஆபத்தான பயணத்தை மேற்கொள்கின்றனர். இவ்வாறு பயணிப்பது உயிரிழப்பு மற்றும் பெருங்காயத்தை ஏற்படத்தக்கூடியது.
எனவே இத்தகைய ஆபத்தான பயணங்களை தடுக்க வேண்டும் என்பதற்காக பள்ளி, கல்லூரி நிர்வாகத்திடம் ஆலோசனை கூட்டம் நடத்தி மாணவர்களுக்கு விழிப்புணர்வு ஏற்படுத்த வேண்டும். தனியார் சரக்கு வாகன உரிமையாளர்கள் மற்றும் ஓட்டுநர்களிடம் மாணவர்கள் மேற்கொள்ளும் ஆபத்தான பயணங்களை அனுமதிக்கக்கூடாது என்று அறிவுறுத்த வேண்டும். அரசு போக்குவரத்து துறை அதிகாரிகளுடன் இணைந்து முன்னெச்சரிக்கை நடவடிக்கைகளை மேற்கொள்ள வேண்டும்” என்று அந்த சுற்றறிக்கையில் அவர் தெரிவித்துள்ளார்.