உத்திரப் பிரதேசம், பஞ்சாப், உத்திரகாண்ட், மணிப்பூர் மற்றும் கோவா ஆகிய 5 மாநிலங்களில் பேரவைத் தேர்தலில் பதிவான வாக்குகள் எண்ணப்பட்டு வருகின்றன. 5 மாநில முடிவுகள் ஜூலையில் நடக்கும் ஜனாதிபதி தேர்தல், 2024 ஆம் ஆண்டு மக்களவைத் தேர்தலில் எதிரொலிக்கும். இதனால் 5 மாநிலங்களிலும் ஆட்சியைப் பிடிக்கப் போவது யார் என்ற எதிர்பார்ப்பு அதிகரித்துள்ளது. கடந்த பிப்ரவரி 10ஆம் தேதி தொடங்கிய தேர்தல் மார்ச் 7ஆம் தேதி முடிவடைந்தது. கொரோனா காலம் என்பதால் பல்வேறு கட்டுப்பாடுகளுக்கு இடையே தேர்தல் ஒரு வழியாக நடந்து முடிந்தது. தற்போது அந்த வாக்குகள் எண்ணப்பட்டு வருகின்றன.
உத்திரப்பிரதேச மாநிலத்தில் லகிம்பூர் தொகுதியில் சமாஜ்வாதி கட்சி முன்னிலையில் இருக்கின்றது. பாஜகவின் கோட்டையாக இருந்து வந்த லக்கிம்பூர் தொகுதியில் பாஜக வேட்பாளர் யோகேஷ் வர்மாவை பின்னுக்கு தள்ளி சமாஜ்வாதி கட்சியின் உத்கார்ஷ் வர்மா முன்னிலை வகிக்கிறார். கடந்த ஆண்டு லகிம்பூரில் போராட்டத்தின்போது கூட்டத்தில் ஜீப் நுழைந்ததில் 8 விவசாயிகள் கொல்லப்பட்ட விவகாரம் இந்த தேர்தலில் எதிரொலிக்கும் என்று அரசியல் நோக்கர்கள் கூறுகின்றனர்.