தென்காசி மாவட்டத்தில் உள்ள சங்கரன்கோவில் அருகே பாஞ்சாங்குளம் என்ற கிராமம் அமைந்துள்ளது. இந்த பகுதியில் ஊராட்சி ஒன்றிய துவக்கப்பள்ளி அமைந்துள்ளது. இந்த பள்ளியில் தீண்டாமை கொடுமை நடப்பதாக தற்போது புகார் எழுந்துள்ளது. அதாவது இருக்கையில் அமர்வது மற்றும் சாப்பாட்டுக்கு தட்டு வழங்குதல் போன்றவற்றில் தீண்டாமை பார்க்கப்படுவதாக குழந்தைகள் வேதனை தெரிவிக்கின்றனர். இந்த தீண்டாமை கொடுமைகளை ஆசிரியர்கள் கண்டு கொள்வதில்லை எனவும் மாணவர்கள் கூறுகின்றனர்.
இந்நிலையில் பாஞ்சாங்குளம் பகுதியைச் சேர்ந்த பெட்டிக்கடை உரிமையாளர் ஒருவர் பட்டியல் இனத்தைச் மாணவரிடம் தீண்டாமையை வெளிப்படுத்தும் விதமாக பேசிய வீடியோ வைரலானதை தொடர்ந்து, பெட்டி கடைக்காரர் உட்பட 3 பேர் கைது செய்யப்பட்டனர். இவர்கள் 3 பேர் மீதும் காவல்துறையினர் வழக்குப்பதிவு செய்து விசாரணை மேற்கொண்டு வரும் நிலையில், அப்பகுதியில் உள்ள பள்ளியிலும் தீண்டாமை கொடுமை நடப்பதாக மாணவர்கள் கூறியுள்ளது பெரும் பரபரப்பை ஏற்படுத்தியுள்ளது.