தெலுங்கு திரையுலகில் முன்னணி கதாநாயகனாகவும், முக்கிய பிரபலமாகவும் வலம் வரும் ராம் சரண் படங்கள் தமிழிலும் டப்பிங் செய்து வெளியிடப்படுகிறது. இவர் பிரபல நடிகர் சிரஞ்சீவியின் மகன். தற்போது ஷங்கர் இயக்கும் தெலுங்கு படத்தில் ராம் சரண் நடித்து வருகிறார். இந்த படம் தமிழ், தெலுங்கு, இந்தி மொழிகளில் தயாராகி வருகிறது. மேலும் கமல்ஹாசன் இந்தியன் 2 படத்தை இயக்கக் கூடாது என்று பட நிறுவனம் நீதிமன்றத்திற்கு சென்றும் இந்த படத்திற்கு தடை விதிக்கப்படவில்லை. இந்த படத்தில் ராம் சரணுக்கு ஜோடியாக இந்தி நடிகை கியாரா அத்வானி நடிக்கிறார்.
ஜெயராம் அஞ்சலி ஆகியோரும் முக்கிய கதாபாத்திரங்களில் நடிக்கிறார்கள். இதன் முதல்கட்ட படப்பிடிப்பு பூனேயில் நடந்தது. ராம்சரண், கியாரா அத்வானி பங்கேற்று நடித்தனர். அங்கு பாடல் காட்சியை படமாக்கினர். இந்த படத்தில் நடிக்க சம்பளமாக ராம்சரண் 100 கோடி ரூபாய் வாங்கியிருப்பதாக வலைதளங்களில் வெளிவந்த தகவல் பரபரப்பை ஏற்படுத்தி வருகிறது. தெலுங்கில் பிரபாஸ் அடுத்து அதிகம் சம்பளம் பெறும் நடிகராக ராம்சரண் உயர்ந்துள்ளார். ராஜமௌலி இயக்கத்தில் ஆர்ஆர்ஆர் படத்திலும் ராம் சரண் நடித்துள்ளார். இந்த படம் அடுத்த மாதம் திரைக்கு வருகிறது.