தமிழ் சினிமாவில் பிரபல காமெடி நடிகராக இருப்பவர் நடிகர் வெங்கல்ராவ். வைகை புயல் வடிவேல் உடன் இணைந்து பல படங்களில் நடித்துள்ளார். இவரது காமெடி காட்சிகள் ரசிகர்களிடையே மிகுந்த வரவேற்பு பெற்றுள்ளது. ஸ்டண்ட் கலைஞரான இவர் 25 ஆண்டுகள் தெலுங்கு மற்றும் தமிழ் சினிமாவில் ஸ்டன்ட் மாஸ்டராக பணியாற்றியுள்ளார் .வடிவேலுக்கு சினிமாவில் நடிக்க தடை போட்டதற்கு பிறகு இவருக்கு வாய்ப்பு இல்லாமல் இருந்து வந்தது.
இதனால் வறுமையில் தவித்து வந்த இவர் சமீபத்தில் யூடியூப் சேனல் ஒன்றிற்கு அளித்த பேட்டியில் தனது நிலை குறித்து கூறியிருந்தார். இந்நிலையில் சிறுநீரக கோளாறால் அவதிப்பட்டு வந்த வெங்கல்ராவ் திடீரென ஹைதராபாத்தில் மருத்துவமனை ஒன்றில் அனுமதிக்கப்பட்டுள்ளார். அவருக்கு மருத்துவர்கள் தீவிர சிகிச்சை அளித்து வருகின்றனர். வெங்கல்ராவ் விரைவில் குணமடைந்து வீடு திரும்ப வேண்டும் என்று திரையுலகினர் மற்றும் ரசிகர்கள் பிரார்த்தனை செய்து வருகின்றனர்.