ஒடிசாவின் நயபள்ளி கட்சாஹியை சேர்ந்தவர் பிரபல ஒடியா நடிகை ரஷ்மிரேகா ஓஜா. இவர் சந்தோஷ் பட்ரா என்பவரை காதலித்து வந்துள்ளார். இவர்கள் இருவரும் அடுத்தாண்டு திருமணம் செய்துக்கொள்ளலாம் என முடிவெடுத்து வாடகை வீட்டில் லிவ்-இன் முறையில் வாழ்ந்து வந்தனர். இந்நிலையில், நேற்றிரவு நடிகை வீட்டில் தூக்கிட்டு தற்கொலை செய்து கொண்ட சம்பவம் அதிர்ச்சியை ஏற்படுத்தியுள்ளது.
வீட்டு உரிமையாளர் அளித்த தகவலின் பேரில் வந்த ஜகத்சிங்பூர் போலிஸார் உடலை மீட்டு உடற்கூறு ஆய்விற்காக அருகில் உள்ள மருத்துவமனைக்கு அனுப்பி வைத்தனர். பின்னர் இதுகுறித்து விசாரணை மேற்கொண்ட போது, வீட்டில் இருந்து 2 துப்பாக்கி, ஒரு கத்தி, வெடிமருந்துகளை கைப்பற்றினர். மேலும் அங்கிருந்த தற்கொலைக் குறிப்பு கடிதத்தையும் கைப்பற்றினர்.
அதில், ‘யாருடைய நிர்பந்தத்திலும் தான் சாகவில்லை’ என எழுதப்பட்டிருந்தது. இதற்கிடையில் நடிகையின் தந்தை மகளின் மரணத்திற்கு காதலன் சந்தோஷ் பட்ரா தான் காரணம் எனவும் இருவரும் லிவ்-இன் முறையில் வாழ்ந்தது தனக்கு தெரியாது என்றும் தெரிவித்துள்ளார். போலீசார் பிரேத பரிசோதனைக்கு பிறகே நடிகையின் மர்ம மரணத்திற்கான காரணம் தெரியவரும் என தெரிவித்துள்ளனர்.