பாகுபலி திரைப்படத்திற்குப் பின் தெலுங்கு நடிகரான பிரபாஸ், பின் பான் இந்தியா நடிகராக மாறினார். இதையடுத்து அவர் நடித்து வெளிவந்த சாஹோ, ராதேஷ்யாம் போன்றவை தோல்வியைத் தழுவினாலும் பிரபாஸுக்கு பிரம்மாண்ட திரைப்படங்களின் வாய்ப்பு வந்துகொண்டுதான் இருக்கிறது. இப்போது பிரம்மாண்ட படங்களான ஆதி புருஷ், சலார், புராஜக்ட் கே போன்ற படங்களில் அவர் நடித்து வருகிறார். இதில் ஆதி புருஷ் திரைப்படத்தின் படப்பிடிப்பு முடிவடைந்து விட்டதால், அடுத்து அவர் ஒரு புது படத்தில் நடிக்க ஒப்பந்தமாகி விட்டார் என டோலிவுட் வட்டாரங்கள் தெரிவிக்கிறது.
தெலுங்குத் திரை உலகத்தின் முன்னணி இயக்குனர்களில் ஒருவரான மாருதி இப்படத்தை இயக்குகிறார் என கூறப்படுகிறது. நிதி அகர்வால், மாளவிகா மோகனன் கதாநாயகிகளாக ஒப்பந்தமாகி இருப்பதாக தகவல் வெளியாகியுள்ளது. அத்துடன் வில்லனாக நடிக்க ஹிந்தி நடிகர் சஞ்சய் தத்திடம் பேசி வருகிறார்களாம். எனினும் அதிகாரப்பூர்வமான அறிவிப்பு விரைவில் வெளியாகும் என தெரிகிறது. இந்த மாதக் கடைசியில் (அல்லது) அடுத்த மாதம் படப் பிடிப்பு ஆரம்பமாகலாம் என்று கூறுகின்றனர்.