பிரித்தானிய பிரதமர் போரிஸ்ஜான்சன் இன்று ராஜினாமா செய்வது தொடர்பாக அறிவிக்க இருக்கும் சூழ்நிலையில், அந்நாட்டின் அடுத்த பிரதமர் யார் என்ற கேள்வி எழுந்துள்ளது. பிரித்தானியாவின் சேன்ஸலரான ரிஷி சுனக் தன் பதவியை ராஜினாமா செய்ததை அடுத்து, பல பேர் தங்களது பதவிகளை ராஜினாமா செய்தார்கள். இந்த நிலையில் ரிஷி பிரித்தானியாவின் அடுத்த பிரதமராகக்கூடும் என்று எதிர்பார்க்கப்படுகிறது. அவ்வாறு ரிஷி பிரதமர் ஆனால் பிரித்தானியாவின் பிரதமராகும் முதல் இந்திய வம்சாவளியினர் என்ற பெருமை அவருக்குக் கிடைக்கும். பிரதமர் பதவிக்கான போட்டியில் உள்ள ரிஷிசுனக் தொடர்பாக தெரிந்து கொள்வோம்.
கடந்த 2020ஆம் வருடம் 42 வயதாகும் ரிஷியை போரிஸ் ஜான்சன் தான் சேன்ஸலராக தேர்ந்தெடுத்தார். கேபினட்டில் அது தான் அவருடைய முதல் முழுமையான பதவி ஆகும். கொரோனா தொற்று காலகட்டத்தின் போது தொழில்களுக்கும், தொழிலாளர்களுக்கும் அவர் வழங்கிய பல்வேறு மில்லியன் பவுண்டுகள் உதவித்தொகை அவரை மிகவும் பிரபலமாக்கியது. இதனிடையில் ரிஷியின் தாத்தா பாட்டி பஞ்சாபில் இருந்து வந்தவர்கள். அவரது மனைவியின் பெயர் அக்ஷதா மூர்த்தி. பிரித்தானிய மகாராணியைவிட அதிக சொத்து மதிப்பு கொண்டவர் அக்ஷதா என்பது குறிப்பிடத்தக்கது.