அர்ஜென்டினாவின் நட்சத்திரக் கால்பந்து வீரரான லியோனல் மெஸ்சி 13 வயது சிறுவனாக பார்சிலோனா அணியில் சேர்ந்தார். 778 ஆட்டங்களில் அந்த அணிக்காக 682 கோல்கள் அடித்துள்ளார். தனிப்பட்ட கிளப் அணிக்காக பீலே அடித்த 643 கோல் என்ற சாதனையை முறியடித்து மெஸ்சி புதிய சாதனை படைத்தார். அந்த அணிக்காக 34 வெற்றி கோப்பைகளையும் பெற்றுத் தந்துள்ளார்.
பார்சிலோனாவுக்காக அதிக கோல்கள் அடித்து சாதனை படைத்த மெஸ்சி, கால்பந்து வரலாற்றில் அதிக ஊதியம் பெறும் வீரராக வலம் வந்தார். மெஸ்சிக்கு வழங்கப்படும் சம்பளம் கடும் நிதி நெருக்கடியை ஏற்படுத்தியதால் பார்சிலோனா நிர்வாகம் அவரது ஒப்பந்த காலத்தை நீட்டிக்க முன்வரவில்லை.
இந்நிலையில் பார்சிலோனா அணியில் இருந்து வெளியேறிய கால்பந்து ஜாம்பவான் மெஸ்சி பிஎஸ்ஜி அணியுடன் ஒப்பந்தம் செய்துள்ளார். பிஎஸ்ஜி அணிக்காக அவர் இரண்டு ஆண்டுகள் விளையாடுவார் என்று அறிவிக்கப்பட்டுள்ளது. பார்சிலோனா அணியில் 21 ஆண்டுகளாக விளையாடிய இவர், நிதி மற்றும் கட்டமைப்பு பிரச்சனை காரணமாக அந்த அணியில் இருந்து கண்ணீர் மல்க வெளியேறினார் என்பது குறிப்பிடத்தக்கது.