பாம்பு கடித்து விவசாயி உயிரிழந்த சம்பவம் சோகத்தை ஏற்படுத்தியுள்ளது.
திருப்பத்தூர் மாவட்டத்தில் உள்ள கோமுட்டேரி பகுதியில் விவசாய மோகன்(60) என்பவர் வசித்து வந்துள்ளார். இவர் தனது வீட்டில் மாடுகளை வளர்த்து வந்துள்ளார். நேற்று மோகன் தனது மாடுகளுக்கு இரை போடுவதற்காக விவசாய நிலத்திற்கு சென்று புல் அறுத்துள்ளார். அப்போது திடீரென வந்த கட்டு விரியன் பாம்பு மோகனின் காலில் கடித்தது. இதனால் அவர் கட்டையால் அந்த பாம்பை அடித்துள்ளார்.
சிறிது நேரத்தில் விஷம் உடல் முழுவதும் பரவி மோகன் அங்கேயே மயங்கி விழுந்துவிட்டார். இதனை பார்த்து அதிர்ச்சியடைந்த அக்கம் பக்கத்தினர் மோகனை மீட்டு மருத்துவமனையில் சிகிச்சைக்காக அனுமதித்தனர். ஆனால் அங்கு சிகிச்சை பலனின்றி மோகன் பரிதாபமாக உயிரிழந்தார். இந்த சம்பவம் குறித்து வழக்கு பதிவு செய்த போலீசார் விசாரணை நடத்தி வருகின்றனர்.