பட்டியல் இனத்தவர்கள் பற்றி சமூகவலைதளங்களில் அவதூறு கருத்துக்களை வெளியிட்டதாக, தமிழ்ச்செல்வி என்ற மீராமிதுன் மீதும், அவருக்கு உடந்தையாக இருந்ததாக அவரது நண்பர் சாம் அபிஷேக் மீதும் வன் கொடுமை தடுப்பு சட்டத்தின் கீழ் சென்னை மத்திய குற்றப் பிரிவு காவல்துறையினர் சென்ற 2021 ஆம் வருடம் ஆகஸ்ட் மாதம் வழக்குபதிவு செய்து இருவரையும் கைது செய்தனர். ஜாமீனில் விடுதலையான இந்த இரண்டு பேருக்கும் எதிராக சென்னை முதன்மை அமர்வு நீதிமன்றத்தில் குற்றப் பத்திரிகை தாக்கல் செய்யப்பட்டது.
சென்ற ஆகஸ்ட் 6ஆம் தேதி வழக்கு விசாரணைக்கு வந்தபோது, மீராமிதுன் ஆஜரகாததால் அவருக்கு எதிராக ஜாமீனில் வெளிவரமுடியாத கைது வாரண்ட் பிறப்பித்து முதன்மை அமர்வு நீதிமன்ற நீதிபதி அல்லி உத்தரவு பிறப்பித்திருந்தார். இந்த நிலையில் இவ்வழக்கு முதன்மை அமர்வு நீதிமன்ற நீதிபதி அல்லி முன் விசாரணைக்கு வந்தது. அப்போது காவல் துறை தரப்பில், நீதிமன்ற உத்தரவின்படி மீராமிதுனை வேளச்சேரி மற்றும் சேத்துப்பட்டில் தேடியும் கிடைக்கவில்லை என்றும் அவர் பெங்களூருவில் இருப்பதாக தெரியவந்துள்ளதாகவும் தெரிவிக்கப்பட்டது. அத்துடன் விரைவில் அவரை கைதுசெய்து நீதிமன்றத்தில் ஆஜர்படுத்துவதாகவும் தெரிவிக்கப்பட்டது. இதனை ஏற்ற நீதிபதி வழக்கின் விசாரணையை இருவாரங்களுக்கு தள்ளி வைத்துள்ளார்.