எட்டு குட்டிகளை பெற்றெடுத்த நாய் ஒன்று வெள்ளத்தில் இருந்து தனது குட்டிகளை காப்பாற்ற ஒவ்வொன்றாக வாயில் கவ்விக் கொண்டு பாதுகாப்பான இடத்திற்கு தூக்கி சென்றது.
வேலூர் புதிய பஸ் நிலையம் அருகே இரு பாலாறு ஆறுகளுக்கு இடையே ஏராளமான நாய்கள் வசித்து வருகின்றனர். புயலால் பெய்த கன மழையால் ஆற்றில் வெள்ளப்பெருக்கு ஏற்பட்டது. வெள்ளம் வந்தபோது பாலாற்றில் வசித்துவந்த நாய்கள் வேறு இடங்களுக்கு ஓடின. இந்நிலையில் 8 குட்டிகளை பெற்ற நாய் ஒன்று வெள்ளத்தில் இருந்து குட்டிகளை காப்பாற்ற ஒவ்வொன்றாக வாயில் கவ்விக் கொண்டு பாதுகாப்பான இடத்திற்கு தூக்கி சென்றது.
மழை வெள்ளம் நாயை சிறிது தூரம் இழுத்துச் சென்றது. எனினும் அதை பொருட்படுத்தாமல் துணிந்து தனது குட்டிகளை காப்பாற்றியது. அந்த நாயால் ஐந்து குட்டிகளை மட்டும் காப்பாற்ற முடிந்தது. மீதமுள்ள மூன்று குட்டிகள் ஆற்றின் நடுப்பகுதியில் கீழே தவித்தது. இதுகுறித்து தகவல் அறிந்து தீயணைப்பு வீரர்கள் பாலத்தில் இருந்து கயிறு கட்டி மூன்று நாய்களை மீட்டனர். நாயின் பாசத்தையும், தீயணைப்பு வீரர்களின் செயல்களையும் பொதுமக்கள் கண்டு வியந்தனர்.