சென்னை பெருங்களத்தூரில் இரண்டு ரயில்வே கேட்கள் இருந்தது. அவற்றில் ஒரு கேட் சென்ற 4 ஆண்டுகளுக்கு முன் மேம்பாலம் கட்டும் பணிக்காக நிரந்தரமாக மூடப்பட்டது. தற்போது புதுப்பெருங்களத்தூர் பகுதியிலுள்ள ஒரேஒரு ரயில்வே கேட் மட்டும் இருக்கிறது. இந்த ரயில்வே கேட் வழியாகதான் பெருங்களத்தூர், பழைய பெருங்களத்தூா், பீர்க்கன்காரணை, சீனிவாசநகர், ஆர்.எம்.கே. நகா் ஆகிய பல்வேறு பகுதிகளுக்கு போகமுடியும். ஆனால் இந்த ரயில்வே கேட்டானது அடிக்கடி நீண்டநேரம் மூடப்படுகிறது. இதன் காரணமாக பொதுமக்கள் பெரும் அவதிக்குள்ளாகி வந்தனர். இந்த நிலையில் நேற்று மாலை 5 மணியளவில் மூடப்பட்ட ரயில் கேட் மாலை 6.30 மணி வரை திறக்கப்படவில்லை.
இதனால் கோபமடைந்த பொதுமக்கள் ரயில் மறியலில் ஈடுபட்டனா். இதன் காரணமாக செங்கல்பட்டு-சென்னை கடற்கரை மின்சாரரயில், சென்னை கடற்கரை-செங்கல்பட்டு மின்சார ரயில் பெருங்களத்தூரில் நிறுத்தப்பட்டது. இதையடுத்து தாம்பரம்-விழுப்புரம் ரயிலானது இரும்புலியூரில் நிறுத்தப்பட்டது. இவ்வாறு 3 பாதைகளிலும் ரயில்கள் நின்றதால், சென்னை எழும்பூரில் இருந்து தென் மாவட்டங்களுக்கு போகும் ரயில்களும் ஆங்காங்கே நிறுத்தப்பட்டது. எனினும் இரவு 7 மணிவரை போலீசாரோ, ரயில்வே அதிகாரிகளோ சம்பவ இடத்திற்கு வரவில்லை. அதன்பிறகு பீா்க்கன்காரணை காவல்துறையினர் சம்பவ இடத்திற்கு வந்து பொதுமக்களிடம் பேச்சுவார்த்தை நடத்தினர்.
இதனால் பொதுமக்கள் மறியலை கைவிட்டு கலைந்துசென்றனர். இதற்கிடையில் அரை மணிநேரம் ரயில் போக்குவரத்து பாதிக்கப்பட்டது. ஆவடி-அண்ணனூர் ரயில் நிலையங்களுக்கு இடையில் தண்டவாளத்தை ஒட்டி இருக்கக்கூடிய சிக்னல் பாயிண்ட்டில் மழைநீர் தேங்கியது. இதனால் சென்னை புற நகர் மின்சார ரயில்கள் போகக்கூடிய இருபுறங்களிலும் சிக்னல் கோளாறு ஏற்பட்டது. ஆகவே சென்னையிலிருந்து அரக்கோணம் மார்க்கமாகவும், அரக்கோணத்திலிருந்து சென்னை மார்க்கமாகவும் போகக்கூடிய புறநகர் மின்சார ரயில்கள் அனைத்தும் ஒன்றன் பின் ஒன்றாக நிறுத்தப்பட்டது. அதன்பின் தகவல் கிடைத்து ரயில்வே ஊழியர்கள் சம்பவ இடத்திற்கு விரைந்து பழுதான சிக்னலை சரி செய்தனர். பின் சுமார் 45 நிமிடங்கள் தாமதமாக மின்சார ரயில்கள் புறப்பட்டு சென்றது. இதனிடையில் மாலை நேரத்தில் அலுவலகம் முடிந்து வீடுகளுக்கு சென்ற பயணிகள் கடும் சிரமத்திற்கு ஆளாகினர்.