செங்கல்பட்டு அருகே மர்ம நபர்கள் கால் டாக்சி டிரைவரை கொலை செய்து விட்டு காரை திருடி சென்ற சம்பவம் பெரும் பரபரப்பை ஏற்படுத்தியுள்ளது.
செங்கல்பட்டு மாவட்டம் வல்லம் பஸ் நிலையம் அருகே நேற்று இரவு அடையாளம் தெரியாத மர்ம நபர் ஒருவர் கழுத்தறுக்கப்பட்ட நிலையில் உயிருக்கு போராடிக் கொண்டிருப்பதாக அந்தப் பகுதியினர் 108 ஆம்புலன்ஸ்க்கு தகவல் தெரிவித்துள்ளனர். இந்த தகவலை தொடர்ந்து சம்பவ இடத்திற்கு வந்த ஆம்புலன்ஸ் மற்றும் ஊழியர்கள் உயிருக்கு போராடிக் கொண்டிருந்த நபரை மீட்டு சிகிச்சைக்காக செங்கல்பட்டு அரசு மருத்துவமனையில் அனுமதித்துள்ளனர். இதனை தொடர்ந்து மருத்துவர்கள் அவருக்கு தீவிர சிகிச்சை மேற்கொண்டு வந்த நிலையில் சிகிச்சை பலனின்றி அந்த நபர் உயிரிழந்துள்ளார்.
இந்த நிலையில் அவரது உடல் பிரேத பரிசோதனைக்காக பிணவறைக்கு எடுத்துச் செல்லப்பட்டுள்ளது. மேலும் சம்பவம் பற்றி வழக்குப்பதிவு செய்த செங்கல்பட்டு தாலுகா போலீசார் இறந்து போன நபர் யார்? எந்த பகுதியை சேர்ந்தவர் அவர் எதற்காக கொலை செய்யப்பட்டார்? என்பது பற்றி விசாரணை மேற்கொண்டு வந்தனர். இந்த நிலையில் இறந்து போனவர் சோழிங்கநல்லூர் அடுத்த ஒட்டியம்பாக்கம் பகுதியை சேர்ந்த பூங்காவனம் என்பவரது மகன் அர்ஜுன் என்பது தெரியவந்திருக்கிறது. இவர் தனியார் கால் டாக்ஸி நிறுவனத்தில் பணிபுரிந்து வருகின்றார். இந்த நிலையில் சவாரிக்காக அழைத்துவந்து அர்ஜுனை கொலை செய்துவிட்டு காரை மர்ம நபர்கள் திருடி சென்றது தெரியவந்துள்ளது. இதனைத் தொடர்ந்து தப்பியோடிய மர்ம நபர்களை தனிப்படை அமைத்து போலீசார் தீவிரமாக தேடி வருகின்றனர்.