வீட்டின் பூட்டை உடைத்து கொள்ளையடித்து சென்ற மர்ம நபர்களை காவல்துறையினர் வலைவீசி தேடி வருகின்றனர்.
பெரம்பலூர் மாவட்டத்தில் உள்ள வடக்கு மாதவி ரோடு அம்மன் நகரில் ரமேஷ்-உஷா தம்பதியினர் வசித்து வருகின்றனர். இந்நிலையில் ரமேஷ் வேலைக்கு சென்ற பிறகு உஷா தனது பெற்றோர் வீட்டிற்கு சென்றுவிட்டார். இதனை அடுத்து உஷாவின் வீட்டு கதவு திறந்து கிடப்பதை பார்த்து அதிர்ச்சியடைந்த அக்கம் பக்கத்தினர் உடனடியாக அவருக்கு தகவல் தெரிவித்துள்ளனர்.
இதனையடுத்து உஷா வீட்டிற்கு வந்து பார்த்தபோது மர்ம நபர்கள் பீரோவில் இருந்த 10ஆயிரம் ரூபாய் பணம், 2 பவுன் தங்க நகை போன்றவற்றை திருடி சென்றது தெரியவந்துள்ளது. இதுகுறித்து உஷா அளித்த புகாரின் பேரில் வழக்குப்பதிவு செய்த காவல்துறையினர் மர்ம நபர்களை தீவிரமாக தேடி வருகின்றனர்.