திருநெல்வேலியில் மின்சாரம் தாக்கியதால் பால் வியாபாரி உயிரிழந்த சம்பவம் சோகத்தை ஏற்படுத்தியுள்ளது.
திருநெல்வேலி மாவட்டம் மானூரில் பால் வியாபாரியான ஸ்டீபன் என்பவர் வசித்து வந்தார். இவரிடம் மின்சாரத்தால் இயங்கக்கூடிய சார்ஜ் போடும் ஸ்கூட்டர் உள்ளது. இந்த நிலையில் இவர் சம்பவத்தன்று தனது ஸ்கூட்டருக்கு சார்ஜ் ஏற்றியுள்ளார். அப்போது ஸ்டீபன் மீது திடீரென்று மின்சாரம் பாய்ந்ததில் அவர் மயங்கி விழுந்தார்.
இதனை கண்டு அதிர்ச்சியடைந்த அவரது குடும்பத்தினர் ஸ்டீபனை மீட்டு சிகிச்சைக்காக அரசு மருத்துவமனைக்கு கொண்டு சென்றனர். அங்கு ஸ்டீபனை பரிசோதனை செய்த டாக்டர்கள் அவர் ஏற்கனவே உயிரிழந்ததாக தெரிவித்துள்ளனர். இச்சம்பவம் குறித்து மானூர் காவல்துறையினர் வழக்குப்பதிவு செய்து தீவிர விசாரணை மேற்கொண்டு வருகின்றனர்.