பொது இடங்களை தூய்மையாக வைத்திருக்குமாறு பொதுமக்களுக்கு அறிவுரை வழங்கப்பட்டுள்ளது.
மயிலாடுதுறை மாவட்டத்திலுள்ள பட்டவிளாகம் கிராமத்தில் முழு சுகாதார விழிப்புணர்வு ஊர்வலம் நடைபெற்றுள்ளது. இந்த ஊர்வலம் ஊராட்சி மன்ற தலைவர் தலைமையிலும், துணை வட்டார வளர்ச்சி அலுவலர், ஒன்றிய பணி மேற்பார்வையாளர் மற்றும் தூய்மை பாரத இயக்கம் ஒருங்கிணைப்பாளர் ஆகியோரின் முன்னிலையிலும் நடைபெற்றுள்ளது. இதில் ஊராட்சி செயலர் வரவேற்புரையாற்றியுள்ளார். மேலும் வட்டார வளர்ச்சி அலுவலர் தொடங்கி வைத்து பேசியுள்ளார்.
அப்போது சீர்காழி ஊராட்சி ஒன்றியத்திற்கு உட்பட்ட 37 ஊராட்சிகளில் அத்தியூர் ஊராட்சி தூய்மை பாரத இயக்கம் சார்பில் முன்மாதிரி ஊராட்சியாக தேர்வு செய்யப்பட்டிருப்பதாகவும், எனவே பொதுமக்கள் அதனை சுத்தமாக வைத்துக் கொள்ளவேண்டும் என்றும், தினமும் மக்கும் குப்பை மக்காத குப்பை என தரம் பிரித்து தூய்மை பணியாளர்களிடம் வழங்க வேண்டும் என்றும் அவர் கூறியுள்ளார். இதற்கு பொதுமக்கள் முழு ஒத்துழைப்பு வழங்கினால்தான் இந்த ஊராட்சி சுகாதாரத்தில் முன்மாதிரி ஊராட்சியாக திகழும் என்று அவர் கூறியுள்ளார்.