விக்ரமின் ‘துருவ நட்சத்திரம்’ திரைப்படத்தின் பணிகளை மீண்டும் தொடங்கிய கவுதம் மேனன் விரைவில் வெளிவரும் என தகவல் வெளியாகி உள்ளது.
தமிழ் திரையுலகில் முன்னணி நடிகராக வலம் வருபவர் விக்ரம். இந்த நிலையில் இவர் நடிப்பில் கௌதம் வாசுதேவ் மேனன் இயக்கத்தில் அனைவராலும் எதிர்பார்க்கப்பட்ட திரைப்படம் ‘துருவ நட்சத்திரம்’. இப்படத்தில் முக்கிய கதாப்பாத்திரங்களில் பார்த்திபன், ரீத்துவர்மா, ராதிகா சரத்குமார், ஐஸ்வர்யா ராஜேஷ், சிம்ரன் உள்ளிட்ட பலர் நடித்துள்ளனர். இதனைத் தொடர்ந்து ‘துருவ நட்சத்திரம்’ திரைப்படத்தின் படப்பிடிப்பு 2017 ஆம் ஆண்டு தொடங்கி வெளிநாடுகளில் முக்கிய காட்சிகள் படமாக்கப்பட்டன. இந்த திரைப்படம் 2018 ல் திரைக்குவர திட்டமிட்டிருந்த நிலையில் பல காரணங்களினால் தள்ளிப்போனது.
இதனைத் தொடர்ந்து கடந்த ஜூன் மாதம் வெளியாக இருந்த நிலையில் கொரோனா காரணமாக அப்போதும் வெளிவரவில்லை. இந்த நிலையில் இந்த படத்தின் வேலைகளை மீண்டும் கௌதம் மேனன் தொடங்கியுள்ளதாகவும், விக்ரம் அவருடைய டப்பிங் பணிகளை கடந்த சில நாட்களாக செய்து வருவதாகவும் தகவல் வெளியாகி உள்ளது. இதனை தொடர்ந்து இப்படத்தின் அடுத்தகட்ட வேலைகள் நடைபெற்று வரும் நிலையில் விரைவில் ‘துருவ நட்சத்திரம்’ திரைப்படம் ரிலீசாகும் என எதிர்பார்க்கப்படுகிறது.