சென்னையில் கொலை, கொள்ளை, திருட்டு வழிப்பறி ஆகிய குற்றச் சம்பவங்களில் ஈடுபடுபவர்கள் போலியான வாகன எண்களை பயன்படுத்தி தப்பிவிடுகின்றனர். இதன் காரணமாக குற்றவாளிகளை பிடிப்பதில் காவல்துறையினருக்கு சிரமம் ஏற்படுகிறது. அதேபோன்று போலி நம்பர்பிளேட் பொருத்தி போக்குவரத்து விதிகளை கடைபிடிக்காமல் சிலபேர் துணிச்சலாக வலம் வருகின்றனர். இதனால் வாகன எண்களின் உண்மைத் தன்மை பற்றி ஆராய்ந்து நடவடிக்கை மேற்கொள்வதற்காக மத்திய அரசின் கட்டுப்பாட்டின் கீழ் பரிவாஹன் இணையதளம் வாயிலாக வாஹன் செயலியை சென்னை போக்குவரத்து காவல்துறையினர் பதிவிறக்கம் செய்துள்ளனர்.
இந்நிலையில் சென்னை போக்குவரத்து காவல்துறையினர் நேற்று முன்தினம் முக்கிய சந்திப்புகளில் இச்செயலியை பயன்படுத்தி வாகன சோதனையில் ஈடுபட்டனர். அதாவது 4,633 வாகனங்களின் எண்ணை ஆவணங்களுடன் ஒப்பிட்டுபார்த்தனர். இதில் குடிசைமாற்று வாரிய குடியிருப்பு பகுதிகளில் மட்டும் மொத்தம் 999 வாகனங்கள் சோதனைக்கு உட்படுத்தப்பட்டது. இச்சோதனையில் குறைபாடுள்ள நம்பர் பிளேட்டுகளை பொருத்தியிருந்த சில வாகன ஓட்டிகளுக்கு காவல்துறையினர் அபராதம் விதித்தனர். இந்த சோதனையானது தொடரும் எனவும் இதுபோன்ற செயல்களில் ஈடுபடும் வாகன ஓட்டிகள் மீது சட்டப்படி நடவடிக்கை மேற்கொள்ளப்படும் எனவும் போலீஸ் உயர் அதிகாரிகள் தெரிவித்து இருக்கின்றனர்.