பொள்ளாச்சி வனப்பகுதியில் இருந்து யானை தந்தங்களை கடத்தி விற்பனைக்கு முயன்ற 6 பேர் கைது செய்யப்பட்டனர்.
பொள்ளாச்சி அடுத்த ஆனைமலை புலிகள் காப்பகத்திற்கு உட்பட்ட பொள்ளாச்சி வனச்சரக ஆழியார் பகுதியில் உள்ள சண்முகபுரம் என்ற இடத்தில் பறவைகள் மற்றும் மீன் வளர்ப்பு கடையில் யானை தந்தங்கள் விற்பனைக்காக பதுக்கி வைக்கப்பட்டுள்ளதாக ரகசிய தகவல் கிடைத்தது. அதன் பெயரில் வன அதிகாரிகள் அந்த கடையில் ஆய்வு மேற்கொண்டபோது யானையின் இரண்டு தந்தங்களையும் வைக்கப்பட்டிருந்தது தெரியவந்தது.
அவற்றை பறிமுதல் செய்த வனத்துறையினர் கடை உரிமையாளர் மணிகண்டன் என்பவரை பிடித்து விசாரணை நடத்தினர். அப்போது வேட்டைதடுப்பு காவலர் சுவாமிநாதன் மற்றும் துப்புரவு பணியாளர் காத்தவராயன் ஆகியோர் இவற்றை வனத்தில் இருந்து எடுத்து வந்த அங்கலக்குறிச்சி சேர்ந்த சிக்கந்தர் பாஷா மற்றும் சாரதி மூலம் அவற்றை விற்பனை செய்ய முயன்றது தெரிய வந்தது.
இதனை அடுத்து 5 பேரை கைது செய்த வனத்துறையினர் சாரதி என்பவரை அங்கலக்குறிச்சி என்ற இடத்தில் கைது செய்தனர். கைது செய்யப்பட்ட 6 பேரும் பொள்ளாச்சி குற்றவியல் நீதிமன்றம் 2-ல் ஆஜர் படுத்தப்பட்டு கோவை மத்திய சிறையில் அடைக்கப்பட்டனர்.