மத்திய அரசு கொண்டு வந்துள்ள கொள்கைகள் தொழிலாளர் நலனை பாதிக்கும் வகையில் இருப்பதாக கூறி நாளை மற்றும் நாளை மறுநாள்(மார்ச் 28,29) ஆகிய 2 நாட்கள் அகில இந்திய பொது வேலை நிறுத்தம் அறிவிக்கப்பட்டுள்ளது. இந்த வேலை நிறுத்த போராட்டத்தில் பல்வேறு துறைகளை சார்ந்த தொழிலாளர்கள் பங்கேற்பதாக அறிவித்துள்ளன.
இந்த போராட்டமானது மின்சார திருத்த சட்டத்தை திரும்பப் பெறுதல்,தொழிலாளர் சட்டத் தொகுப்புகளை கைவிடுதல் மற்றும் பொதுத்துறை நிறுவனங்களை தனியார் மயமாக்குதல் உள்ளிட்ட மத்திய அரசின் திட்டங்களை கைவிடுமாறு 12 அம்ச கோரிக்கைகளை வலியுறுத்தி நடைபெற உள்ளது.
மேலும் வங்கிகள் தனியார் மயமாக்கும் முயற்சிக்கு எதிர்ப்பு தெரிவித்து நாளையும், நாளை மறுநாளும் வங்கி ஊழியர்களும் இந்த போராட்டத்தில் பங்கேற்க உள்ளதாக அகில இந்திய வங்கி ஊழியர்கள் சங்கம் அறிவித்துள்ளது. இதன் காரணமாக 2 நாட்கள் வங்கிகளின் சேவை பாதிக்கப்பட வாய்ப்புள்ளதாக தெரிவிக்கப்பட்டுள்ளது.