மது அருந்தியதை தாய் கண்டித்ததால் கூலித்தொழிலாளி விஷம் குடித்து தற்கொலை செய்துகொண்ட சம்பவம் அப்பகுதியில் பரபரப்பை ஏற்படுத்தியுள்ளது.
நாமக்கல் மாவட்டம் கபிலர்மலையை அடுத்துள்ள இருகூரை கிராமத்தில் கவின் என்பவர் வசித்து வந்துள்ளார். கூலித் தொழிலாளியான இவர் தினமும் மது அருந்தி விட்டு வீட்டிற்கு வந்து தகராறு செய்வதாக கூறப்படுகிறது. இதனால் கவினின் தாயார் சாந்தி மதுபழக்கத்தை கைவிடுமாறு கண்டித்துள்ளார். இதனால் மனமுடைந்தகவின் வீட்டில் விஷம் குடித்து தற்கொலைக்கு முயன்றுள்ளார்.
இதனை பார்த்து அதிர்ச்சி அடைந்த சாந்தி உடனடியாக அக்கம் பக்கத்தினர் உதவியுடன் கவினை மீட்டு பரமத்திவேலூர் அரசு மருத்துவமனையில் அனுமதித்துள்ளனர். இதனையடுத்து மேல்சிகிச்சைக்காக நாமக்கல் அரசு மருத்துவமனைக்கு மருத்துவர்கள் அனுப்பி வைத்துள்ளனர். அங்கு தீவிர சிகிச்சை அளிக்கப்பட்டு வந்த நிலையில் சிகிச்சை பலனின்றி கவின் உயிரிழந்துள்ளார். இதுகுறித்து தகவலறிந்து சென்ற பரமத்திவேலூர் காவல்துறையினர் வழக்குப் பதிவு செய்து விசாரணை மேற்கொண்டு வருகின்றனர்.