மது அருந்தும் போது ஏற்பட்ட தகராறில் ஒருவர் அடித்து கொலை செய்யப்பட்ட சம்பவம் பரபரப்பை ஏற்படுத்தியுள்ளது.
ராணிப்பேட்டை மாவட்டத்திலுள்ள அரக்கோணம் பகுதியில் ரயில்வே போலீஸ் லைன் தெருவில் உள்ள சாக்கடையில் ஒருவர் பிணமாக கிடந்துள்ளார். இதனை பார்த்து அதிர்ச்சியடைந்த பொதுமக்கள் அரக்கோணம் காவல் நிலையத்திற்கு தகவல் தெரிவித்துள்ளனர். அந்த தகவலின்படி சம்பவ இடத்திற்கு விரைந்து சென்ற காவல்துறையினர் இறந்து கிடந்த நபரின் சடலத்தை மீட்டு பிரேத பரிசோதனைக்காக அரக்கோணம் அரசு மருத்துவமனைக்கு அனுப்பி வைத்துள்ளனர். மேலும் இதுகுறித்து வழக்குப்பதிவு செய்த காவல்துறையினர் நடத்திய விசாரணையில் சடலமாக மீட்கப்பட்ட நபர் அரக்கோணம் மசூதி தெருவில் வசித்த ஜாகிர் உசேன் என்பது தெரியவந்துள்ளது.
இவருக்கு திருமணமாகி மனைவி மற்றும் 2 குழந்தைகள் இருக்கின்றனர். இந்நிலையில் ஜாகிர் உசேன் தனது நண்பர்களான சாலஷா மற்றும் கமலேஷ் ஆகியோருடன் இணைந்து மது அருந்தியுள்ளார். அப்போது தீடீரென மூன்று பேருக்கும் இடையே தகராறு ஏற்பட்டுள்ளது. இதில் கோபமடைந்த சாலாஷா மற்றும் கமலேஷ் ஆகியோர் விறகு கட்டையை எடுத்து ஜாகிர் உசேனை பலமாக தாக்கி அருகிலிருந்த சாக்கடையில் தள்ளி விட்டுள்ளனர். இதனால் படுகாயமடைந்த ஜாகிர் உசேன் சம்பவ இடத்திலேயே பரிதாபமாக உயிரிழந்தது விசாரணையில் தெரியவந்துள்ளது. இதனையடுத்து சாலஷா மற்றும் கமலேஷ் ஆகிய இருவரையும் கைது செய்துள்ளனர்.