புரசைவாக்கத்தில் இளம்பெண் சாவில் திடீர் திருப்பம் கணவரே கொலை செய்துவிட்டு மழைநீரில் வழுக்கி விழுந்து இறந்ததாக நாடகமாடியது அம்பலமாகியுள்ளது.
சென்னை புரசைவாக்கம் பகுதியை சேர்ந்தவர் வினோத்குமார். இவர் கொளத்தூரில் உள்ள தனியார் விளம்பர நிறுவனம் ஒன்றில் புகைப்பட கலைஞராக பணியாற்றி வருகிறார். இவருக்கு ஹேமாவதி என்ற மனைவியும் ஐந்து வயது பெண் குழந்தையும் உள்ளது. இந்நிலையில் இரண்டு நாட்களுக்கு முன்பு ஹேமாவதி மழை நீரில் வழுக்கி விழுந்து தலையில் காயம் ஏற்பட்டுள்ளதாக கூறி வினோத்குமார் கீழ்ப்பாக்கம் மருத்துவமனைக்கு அழைத்துச் சென்றுள்ளார். அங்கு அவரை பரிசோதனை செய்த மருத்துவர்கள் ஹேமாவதி இறந்து விட்டதாக கூறியுள்ளனர். மேலும் ஹேமாவதியின் உடலை பிரேத பரிசோதனைக்காக அனுப்பி வைத்துள்ளனர். இதனைத்தொடர்ந்து ஹேமாவதியின் தந்தை தனது மகளை அவருடைய கணவர் தான் கொலை செய்துள்ளார் என கீழ்ப்பாக்கம் காவல் நிலையத்தில் புகார் அளித்துள்ளார்.
இதனைத்தொடர்ந்து பிரேத பரிசோதனை அறிக்கையில் ஹேமாவதி கழுத்து நெரித்து கொலை செய்யப்பட்டுள்ளார் என தெரியவந்துள்ளது. இதனை தொடர்ந்து வினோத்குமாரிடம் நடத்தப்பட்ட விசாரணையில் உண்மையை ஒத்துக்கொண்ட வினோத்குமார் மனைவியை கொலை செய்துவிட்டு நாடகமாடியது அம்பலமாகியுள்ளது. இதனை தொடர்ந்து கீழ்ப்பாக்கம் காவல்நிலைய இன்ஸ்பெக்டர் இதனை கொலை வழக்காக மாற்றி வினோத்குமாரிடம் விசாரணை நடத்தி வருகிறார். மேலும் அவர் விசாரணைக்கு பின் நீதிமன்ற காவலில் வைக்கப்படுவார் என எதிர்பார்க்கப்படுகிறது.