‘மன்கட்’ வேண்டாம் …. “ஆனா இங்கிலாந்தை மட்டும் அவுட் பண்ணலாம்”…. ஆஸி வீராங்கனை நக்கல் பதில்..!!

ஆஸ்திரேலியாவின் நட்சத்திர மகளிர் கிரிக்கெட் வீராங்கனையான எலிஸ் பெர்ரி தீப்தி சர்மா செய்த் ரன் அவுட் குறித்து கிண்டலாக கருத்து தெரிவித்துள்ளார்.

இந்திய மகளிர் கிரிக்கெட் அணியின் நட்சத்திரம் தீப்தி ஷர்மா, லார்ட்ஸில் நடந்த தொடரின் 3ஆவது ஒருநாள் போட்டியில் நான்-ஸ்ட்ரைக்கர் முடிவில் சார்லோட் டீனை மன்கட் முறையில் ரன் அவுட் செய்தது உலகம் முழுவதும் பேசப்பட்டது. இது இன்னிங்ஸின் இறுதி விக்கெட் ஆகும், அதாவது இந்தியா 16 ரன்கள் வித்தியாசத்தில் வெற்றி பெற்று இங்கிலாந்து மகளிர் அணியை 3-0 என்ற கணக்கில் க்ளீன் ஸ்வீப் செய்தது. ‘மன்கட்’ என்று அழைக்கப்படும் இந்த நீக்கம், மேரிலெபோன் கிரிக்கெட் கிளப்பால் ‘அன்ஃபெயர் ப்ளே’ என்பதிலிருந்து ‘ரன் அவுட்’ ஆக மாற்றப்பட்டது. இந்த மாத தொடக்கத்தில், சர்வதேச கிரிக்கெட் கவுன்சிலும் (ஐசிசி) ‘மன்கட்’ சட்டப்பூர்வமாக்குவதாக அறிவித்தது.

இருப்பினும், தீப்தி ஷர்மாவின் ரன் அவுட் தொடர்ச்சியான வலுவான எதிர்வினைகளை ஏற்படுத்தியது. இந்த ரன் அவுட்டுக்கு ஆதரவாகவும் எதிராகவும் கருத்துக்கள் கிரிக்கெட் உலகில் பேசப்பட்டன.. இது சட்டப்பூர்வமாக்கப்பட்ட போதிலும், பல முன்னாள் மற்றும் தற்போதைய இங்கிலாந்து கிரிக்கெட் வீரர்கள் தீப்தியின் முடிவுக்கு தங்கள் அதிருப்தியை வெளிப்படுத்தினர். அதேசமயம் இந்திய கிரிக்கெட் வீரர்கள் உட்பட பலரும் தீப்தி செய்தது சரியே என்று தெரிவித்து வருகின்றனர்.. இந்நிலையில் ஆஸ்திரேலியாவின் நட்சத்திர மகளிர் கிரிக்கெட் வீராங்கனையான எலிஸ் பெர்ரி அந்த ரன் அவுட்டை வேடிக்கையாக எடுத்துக் கொண்டார்.

இதுகுறித்து பெர்ரி நீக்கத்திற்கு ஆதரவாக இருக்கக்கூடாது என்று சுட்டிக்காட்டியிருந்தாலும், அவர் தனது கருத்தில்  “ஒட்டுமொத்த சாராம்சம் நன்றாக இல்லை என்று நான் நினைக்கிறேன், மன்கட் முறையில் ஆட்டமிழக்க செய்வது சரியானதல்ல.. அதை செய்ய வேண்டாம், ஆனால் நீங்கள் அதை செய்யப் போகிறீர்கள் என்றால், இங்கிலாந்துக்கு செய்யுங்கள்” என்று கிண்டலாக கூறினார்.

பொதுவாக இங்கிலாந்து – ஆஸ்திரேலியா இடையே எப்போதும் கடுமையான போட்டியே நிலவும். இரு அணிகளுமே களத்தில் வார்த்தை போரில் ஈடுபடுவதை நாம் பார்த்திருக்கிறோம்.. எனவே அதனால்தான் இந்த விவகாரத்தில் பெர்ரி  கிண்டல் செய்துள்ளார் என கூறப்படுகிறது.

முன்னதாக தீப்தி  “இது எங்கள் திட்டத்தின் ஒரு பகுதியாக இருந்தது, நாங்கள் ஏற்கனவே அவரை எச்சரித்தோம், நடுவரிடமும் சொன்னோம், நாங்கள் விதிகளைப் பின்பற்றி அவுட் செய்தோம். ஒவ்வொரு அணியும் வெற்றி பெற விரும்புகிறது, வெற்றியின் மூலம் அவருக்கு (ஜூலன் கோஸ்வாமி) நல்ல பிரியாவிடை வழங்க விரும்பினோம். ஒரு குழுவாக எங்களால் என்ன செய்ய முடியுமோ அதை செய்தோம். ஆனால் அவர் (டீன்) மறுபடியும் அதைச் செய்தார், அதனால் எங்களால் எதுவும் செய்ய முடியாது”என்று கூறியது குறிப்பிடத்தக்கது.