ஈரோடு மாவட்டத்தில் உள்ள சத்தியமங்கலம் புலிகள் காப்பகத்திற்கு உட்பட்ட வனப்பகுதியில் ஏராளமான வனவிலங்குகள் வாழ்ந்து வருகின்றன. கடந்த 19-ஆம் தேதி பண்ணாரி சோதனை சாவடி அருகே சிறுத்தை சாலையை கடந்து சென்ற வீடியோ கண்காணிப்பு கேமராவில் பதிவாகியது. இதனால் வனத்துறை சோதனை சாவடி மற்றும் பண்ணாரி சோதனை சாவடியில் வேலை பார்க்கும் அதிகாரிகள் ஒருவித பயத்துடன் வேலை பார்த்து வந்தனர்.
நேற்று முன்தினம் இரவு 10:30 மணி அளவில் பண்ணாரி போலீஸ் சோதனை சாவடி பின்புறம் இருக்கும் மரத்தின் கிளையில் சிறுத்தை ஒன்று உட்கார்ந்திருந்ததை பார்த்து போலீசார் அதிர்ச்சியடைந்தனர். இதனையடுத்து போலீசார் அறைக்குள் சென்று சிறுத்தையின் நடவடிக்கையை கண்காணித்தனர். எனவே சோதனை சாவடி பகுதியில் சிறுத்தையை கூண்டு வைத்து பிடிக்க வேண்டும் என போலீசார் வனத்துறையினருக்கு கோரிக்கை விடுத்துள்ளனர். இந்த சம்பவம் அப்பகுதியில் பரபரப்பை ஏற்படுத்தியுள்ளது.