மின்சாரம் தாக்கி மாணவி உயிரிழந்த சம்பவம் சோகத்தை ஏற்படுத்தியுள்ளது.
சென்னை மாவட்டத்திலுள்ள நங்கநல்லூர் இந்து காலனி 2-வது மெயின் ரோட்டில் மனோ பட்நாயக் என்பவர் வசித்து வருகிறார். இவருக்கு அனன்யா என்ற மகள் இருந்துள்ளார். இவர் அப்பகுதியில் இருக்கும் தனியார் பள்ளியில் 11-ஆம் வகுப்பு படித்து வந்துள்ளார். இந்நிலையில் வீட்டின் பால்கனியில் வெயிலில் காய வைத்திருந்த சிறிய தலையணை அருகில் இருக்கும் புங்க மரத்தில் விழுந்துவிட்டது. இதனை பார்த்ததும் அனன்யா பால்கனியில் நின்று கொண்டு அலுமினிய குழாய் மூலம் தலையணையை எடுப்பதற்கு முயற்சி செய்துள்ளார்.
அப்போது எதிர்பாராதவிதமாக அனன்யாவின் கையில் இருந்த கம்பி மேலே சென்ற உயர் மின் அழுத்த கம்பியில் உரசியதால் மின்சாரம் தாக்கி மாணவி மயங்கி கீழே விழுந்துவிட்டார். இதனை பார்த்ததும் அதிர்ச்சி அடைந்தவர்கள் உடனடியாக மாணவியை மீட்டு மருத்துவமனைக்கு சிகிச்சைக்காக கொண்டு சென்றனர். அங்கு அனன்யாவை பரிசோதித்த மருத்துவர்கள் அவர் ஏற்கனவே இறந்துவிட்டதாக தெரிவித்துள்ளனர். இதுகுறித்து வழக்குப்பதிவு செய்த காவல்துறையினர் தீவிர விசாரணை மேற்கொண்டு வருகின்றனர்.