இந்தியாவில் ஒவ்வொரு ஆண்டும் ஜூலை 1ஆம் தேதி மருத்துவர்கள் தினமாக கொண்டாடப்படுகின்றது. மாபெரும் மருத்துவ மேதையும், மேற்குவங்கத்தில் இரண்டாவது முதல்வர் என்ற பெருமைக்குரியவர் டாக்டர் பிதான் சந்திர ராய் பிறந்த தினத்தை முன்னிட்டு டாக்டர் தினம் இந்தியாவில் கொண்டாடப்படுகின்றது. மருத்துவர்கள் கடவுளுக்கு அடுத்தபடியாக பார்க்கப்படுகிறார்கள். அவர்களின் சேவை என்பது மிகவும் புனிதமானது. அதுவும் இந்த கொரோனா பேரிடர் காலத்தில் தங்களது உயிரையும் பொருட்படுத்தாமல், நோயாளிகளின் உயிர்களை காப்பாற்றுவதற்கு மிகவும் கஷ்டப்பட்டு வருகின்றனர்.
தங்களது குடும்பம், வாழ்க்கை என்று தன்னலம் யோசிக்காமல், பொதுமக்களின் நலனே முக்கியம் என்று பணியாற்றி வருகின்றனர். அவர்களுக்கு நமது நெஞ்சார்ந்த பாராட்டுகளைத் தெரிவித்துக் கொள்ள வேண்டும். இந்தியாவில் பல பகுதிகளில் தேசிய மருத்துவர்கள் தினம் கொண்டாடப்பட்டு வருகின்றது. அந்தவகையில் புதுச்சேரியில் இந்திரா காந்தி அரசு மருத்துவமனையில் பணியாற்றும் மருத்துவர்கள் உடன் இணைந்து தேசிய மருத்துவ தினம் இன்று கொண்டாடப்பட்டது. இதில் புதுச்சேரி துணைநிலை ஆளுநர் தமிழிசை சவுந்தரராஜன் கலந்து கொண்டார். இந்தகொரோனா கால கட்டத்தில் தனது உயிரையும் பொருட்படுத்தாமல் மக்களுக்காக மற்றும் மருத்துவர்களின் பணி மிகவும் பாராட்டுக்குரியது என்று அவர் அந்த நிகழ்ச்சியில் தெரிவித்தார்.