மறைந்த நடிகர் தீப்பெட்டி கணேசன் குடும்பத்திற்கு உதவி செய்வேன் என நடிகர் ராகவா லாரன்ஸ் தெரிவித்துள்ளார்.
தமிழ் திரையுலகில் நடிகர் தீப்பெட்டி கணேசன் ரேனிகுண்டா படத்தில் முக்கிய கதாபாத்திரத்தில் நடித்து பலரது கவனத்தை ஈர்த்தவர் . இதை தொடர்ந்து இவர் தென்மேற்கு பருவக்காற்று, பில்லா 2, நீர்பறவை, கோலமாவு கோகிலா உள்ளிட்ட சில படங்களில் நடித்தார். கடைசியாக இவர் உதயநிதி ஸ்டாலினின் கண்ணே கலைமானே படத்தில் நடித்திருந்தார். கொரோனா ஊரடங்கு காலத்தில் பொருளாதார ரீதியாக கஷ்டப்பட்டு வருவதாக நடிகர் தீப்பெட்டி கணேசன் வீடியோ வெளியிட்டிருந்தார். இதையடுத்து அவருக்கு நடிகர் விஷால், பாடலாசிரியர் சினேகன் உள்ளிட்ட ஒரு சிலர் உதவினர். மேலும் அவரது குழந்தைகளின் கல்விச் செலவை ஏற்றுக் கொள்வதாக நடிகர் ராகவா லாரன்ஸ் அறிவித்திருந்தார்.
இந்நிலையில் உடல்நலக்குறைவால் பாதிக்கப்பட்டிருந்த தீப்பெட்டி கணேசன் இன்று சிகிச்சை பலனின்றி உயிரிழந்துள்ளார். இதையடுத்து அவருடைய மறைவுக்கு திரையுலகினர் பலர் இரங்கல் தெரிவித்தனர். தற்போது நடிகரும் இயக்குநருமான லாரன்ஸ் தனது டுவிட்டர் பக்கத்தில் தீப்பெட்டி கணேசனின் குழந்தைகள் படிப்பிற்கான செலவுகளை ஏற்றுக் கொள்வதாகவும் இனிவரும் காலத்தில் இயன்றவரையிலான உதவிகளை அவரின் குழந்தைகளுக்கு செய்வதாகவும் தெரிவித்துள்ளார்.