மலைக்குடிப்பட்டி கிராமத்தில் நடந்த மீன்பிடித் திருவிழாவில் ஏராளமான மக்கள் கலந்து கொண்டுள்ளனர்
புதுக்கோட்டை மாவட்டம், இலுப்பூர் அருகில் மலைக்குடிப்பட்டியில் உள்ள புலவன் குளத்தில் கடந்த சில மாதங்களுக்கு முன்பு பெய்த கன மழையால் நீர் நிரம்பி உள்ளது. இந்நிலையில் குளத்தில் தண்ணீர் வற்றியதால் மீன்பிடித் திருவிழா நடத்த அப்பகுதி மக்கள் முடிவு செய்துள்ளனர். இதை அடுத்து நேற்று காலை கிராமத்தில் உள்ள பெரியவர்கள் வெள்ளை துண்டை வீசி கொடியசைத்து மீன்பிடித் திருவிழாவை தொடங்கி வைத்தனர்.
இந்த மீன்பிடி திருவிழாவில் பொதுமக்கள் வலை, கச்சா உள்ளிட்ட மீன்பிடி உபகரணங்களை வைத்து குளத்தில் இறங்கி மீன்களை பிடித்தனர். இதில் நாட்டு வகை மீன்களான ரோகு, கெளுத்தி, குறவை, விரால் உள்ளிட்ட பல்வேறு வகை மீன்களை பிடித்து பொதுமக்கள் விற்பனை செய்யாமல் அதை தங்களது வீட்டிற்கு எடுத்துச் சென்று சமைத்து சாப்பிடுவார்கள். இந்த மீன்பிடி திருவிழா நடத்துவதால் மழை பொழிந்து விவசாயம் செழிக்கும் என்பது இந்த கிராம மக்களின் நம்பிக்கை.