மாடியில் இருந்து கீழே விழுந்து டீ மாஸ்டர் உயிரிழந்த சம்பவம் அப்பகுதியில் சோகத்தை ஏற்படுத்தியுள்ளது.
நாமக்கல் மாவட்டம் ராமாபுரம் புதூர் சாவடி தெருவில் மனோகரன் என்பவர் வசித்து வந்துள்ளார். இவர் மோகனூர் பேருந்து நிலையத்தில் உள்ள டீக்கடை ஒன்றில் டீ மாஸ்டராக பணிபுரிந்து வந்துள்ளார். இந்நிலையில் மனோகர் சம்பவத்தன்று தனது அறையின் மாடியில் நின்று கொண்டிருந்தார். அப்போது எதிர்பாராதவிதமாக நிலை தடுமாறி மாடியிலிருந்து கீழே விழுந்துள்ளார்.
இதனை பார்த்த அக்கம்பக்கத்தினர் உடனடியாக அவரை மீட்டு நாமக்கல் அரசு மருத்துவமனைக்கு அழைத்து சென்றுள்ளனர். இதனையடுத்து மருத்துவர்கள் மேல்சிகிச்சைக்காக மனோகரை சேலம் அரசு மருத்துவமனைக்கு அனுப்பி வைத்துள்ளனர். அங்கு தீவிர சிகிச்சை அளிக்கப்பட்ட நிலையிலும் மனோகர் சிகிச்சை பலனின்றி பரிதாபமாக உயிரிழந்துள்ளார். இதுகுறித்து தகவலறிந்த மோகனூர் காவல்துறையினர் வழக்குபதிவு செய்து விசாரித்து வருகின்றனர்.