புலி மாட்டை அடித்து கொன்ற சம்பவம் பொதுமக்களிடையே அச்சத்தை ஏற்படுத்தியுள்ளது.
ஈரோடு மாவட்டத்திலுள்ள தாளவாடியில் விவசாயியான நாகமணி(48) என்பவர் வசித்து வருகிறார். இவர் தனது வீட்டில் மாடுகளை வளர்த்து வருகிறார். இந்நிலையில் மதியம் 12.30 மணி அளவில் தோட்டத்தில் மேய்ந்து கொண்டிருந்த மாடுகள் திடீரென சத்தம் போட்டது. அந்த சத்தத்தை கேட்டு நாகமணி விரைந்து சென்று பார்த்துள்ளார். அப்போது கழுத்து முதுகு போன்ற பகுதிகளில் கடித்துக் குதறப்பட்ட நிலையில் மாடு இறந்து கிடந்ததை பார்த்து நாகமணி அதிர்ச்சி அடைந்தார். இதுகுறித்து உடனடியாக வனத்துறையினருக்கு தகவல் தெரிவிக்கப்பட்டது. அந்த தகவலின் படி சம்பவ இடத்திற்கு விரைந்து சென்ற வனத்துறையினர் அங்கு பதிவாகிய கால் தடங்களை ஆய்வு செய்தனர்.
அப்போது மாட்டை அடித்துக் கொன்றது புலி தான் என்பதை வனத்துறையினர் உறுதி செய்தனர். இதனால் வனத்துறையினர் அங்கு தீவிர கண்காணிப்பு பணியில் ஈடுபட்டுள்ளனர். இதுகுறித்து பொதுமக்கள் கூறும்போது இதுவரை 3 நாய் மற்றும் 2 கன்றுக் குட்டிகளை புலி அடித்து கொன்றது. எனவே அட்டகாசம் செய்யும் புலியை கூண்டு வைத்து பிடிக்க வனத்துறையினர் நடவடிக்கை எடுக்க வேண்டும் என கோரிக்கை விடுத்துள்ளனர். இந்த சம்பவம் அப்பகுதி மக்களிடையே அச்சத்தை ஏற்படுத்தியுள்ளது.