ஒரே நேரத்தில் இரண்டு பட்டப்படிப்புகளை படிக்கும் வாய்ப்பு குறித்த அறிவிப்பு சமீபத்தில் வெளியிடப்பட்டது. இதுகுறித்து யுஜிசி தலைவர் ஜெகதீஷ் குமார் கூறுகையில், மாணவர்கள் தங்களுடைய பன்முகத் திறமையை வளர்த்துக் கொள்வதற்காக ஒரே நேரத்தில் இரண்டு பட்டப்படிப்புகள் படிக்க அனுமதி வழங்கப்பட்டுள்ளது. அதன் மூலமாக மாணவர்கள் தங்களுடைய திறமை மற்றும் எதிர்பார்ப்பு ஆகியவற்றின் அடிப்படையில் கல்வித்தகுதியை சுயமாக நிர்ணயித்துக் கொள்ள முடியும்.
ஒரே நேரத்தில் எப்படி இரண்டு பட்டப்படிப்புகளுக்கான பாடங்களை படிப்பது என்ற கேள்வி உங்களுக்குள் எழலாம். ஒரு பட்டப்படிப்பை காலை நேர கல்லூரியிலும், அதே கல்லூரியில் அல்லது மற்றொரு கல்லூரியின் மாலைநேர வகுப்பில் மற்றொரு பட்டப்படிப்பையும் தொடரலாம். அல்லது ஒன்றை கல்லூரியிலும் மற்றொரு படிப்பை ஆன்லைன் மூலமாகவும் படிக்கலாம்.
ஒரே மாணவர் இரண்டு பட்டப்படிப்புகள் சேருவதால் மற்றொரு மாணவருக்கான வாய்ப்பு ஒருபோதும் பறிபோகாது. ஒரு பட்டப் படிப்பை படிக்கும் மாணவர்களுக்கு கல்லூரிகளில் முன்னுரிமை வழங்க வேண்டும். காலியாக இருக்கும் இடங்களில் மட்டுமே இரட்டைப் பட்டப் படிப்பு மாணவர்களை சேர்க்க வேண்டும். இரட்டைப் பட்டப் படிப்பு என்பது கட்டாயமில்லை. ஆர்வம் உள்ளவர்கள் மட்டும் இதனை பயன்படுத்திக் கொள்ளலாம் என்று அவர் தெரிவித்துள்ளார்.