விருதுநகர் மாவட்ட ராஜபாளையம் மதுரை சாலையில் அன்னப்பராஜா மேல்நிலைப்பள்ளி செயல்பட்டு வருகிறது. இந்த பள்ளியில் யுனைடெட் யோகா மற்றும் கிங் மேக்கர் விளையாட்டுக்கழகம் சார்பில் யோகா போட்டிகள் நடைபெற்றது. மாநில அளவில் நடைபெற்ற இந்த போட்டியில் சென்னை, கோவை, மதுரை, விருதுநகர், நெல்லை, தென்காசி, விழுப்புரம், குமரி ஆகிய பகுதிகளில் உள்ள 32 பள்ளிகளில் படிக்கும் 1,452 மாணவ மாணவிகள் கலந்து கொண்டனர். அதனைத் தொடர்ந்து இந்தப் போட்டி வயதின் அடிப்படையில் 9 பிரிவுகளாக நடைபெற்றது.
இதில் மாணவ, மாணவிகள் எண்ணற்ற யோகாசனங்களை செய்தனர். இந்த போட்டியில் ஒட்டுமொத்த பரிசை முதுகுடியை சேர்ந்த செயின்ட் ஜோசப் பள்ளி மாணவ மாணவிகள் பெற்றனர். இதனையடுத்து ஒவ்வொரு பிரிவிலும் அதிக புள்ளிகள் பெற்ற 5 மாணவர்கள் மற்றும் 4 மாணவிகள் என ஒன்பது பேருக்கு தனிநபர் பரிசுகளும் வழங்கப்பட்டது. மேலும் இந்த போட்டியின் நடுவில் தேவைப்பட்டினத்தை சேர்ந்த இளைஞர்கள் மள்ளர் கம்பத்தின் உச்சியில் அமர்ந்து யோகா செய்து காட்டினர்.