நாடு முழுவதும் மாற்றுத்திறனாளிகளுக்கான இலவச பேருந்து பயண அட்டை மார்ச் 31ம் தேதி வரை பயன்படுத்தி பயணிக்கலாம் என்று அறிவிக்கப்பட்டுள்ளது.
இந்தியாவில் கொரோனா அச்சுறுத்தல் காரணமாக கடந்த மார்ச் மாதம் ஊரடங்கு அமல்படுத்தப்பட்டது. அப்போது பலத்த கட்டுப்பாடுகள் விதிக்கப்பட்டன. அதிலும் குறிப்பாக போக்குவரத்து சேவை முடக்கப்பட்டது. அதனால் மக்கள் அனைவரும் வீட்டை விட்டு வெளியேறாமல் வீட்டிலேயே முடங்கிக் கிடந்தனர். அதன்பிறகு கொரோனா பாதிப்பு குறைந்து வரும் நிலையில், ஊரடங்கு தளர்வுகளை அரசு அறிவித்து வருகிறது. அதன் முக்கிய பகுதியாக போக்குவரத்து சேவை மீண்டும் தொடங்கப்பட்டுள்ளது. இருந்தாலும் குறிப்பிட்ட அளவிலான பேருந்துகள் மட்டுமே இயக்கப்பட்டு வருகின்றன.
இந்நிலையில் மாற்றுத்திறனாளிகளுக்கான இலவச பேருந்து பயண அட்டையை மார்ச் 31ம் தேதி வரை பயன்படுத்தி பயணிக்கலாம் என அறிவிக்கப்பட்டுள்ளது. இலவச பயண அட்டையை புதுப்பிக்க வேண்டிய மாற்றுத்திறனாளிகள் மொத்தமாக வருவதால், பயண அட்டை வழங்க சிரமம் ஏற்படுகிறது. மேலும் கொரோனா முன்னெச்சரிக்கை நடவடிக்கை காரணமாகவும் இலவச பயண அட்டையை மார்ச் 31ம் தேதி வரை அனைத்து அரசு பேருந்துகளிலும் பயன்படுத்த ஒப்புதல் வழங்கப்பட்டுள்ளது.