மியான்மரில் கடந்த ஆண்டு ஏற்பட்ட நிலச்சரிவில் சிக்கி 170 தொழிலாளர்கள் உயிரோடு புதைந்து இறந்த அதே சுரங்கத்தில் இன்று 80-க்கும் மேற்பட்டோர் சிக்கிக்கொண்டு உள்ளதாக அதிர்ச்சி தகவல் வெளியாகி உள்ளது. வடக்கு மியான்மர் கச்சின் மாநிலத்தின் பகந்த் என்ற இடத்தில் பச்சை மாணிக்க கற்களை வெட்டியெடுக்கும் சுரங்கப் பகுதியில் நேற்று 4 மணி அளவில் நிலச்சரிவு ஏற்பட்டுள்ளது. அந்த நிலச்சரிவில் ஏறக்குறைய 80 பேருக்கு மேல் மாயமாகி உள்ளதாக மீட்புக் குழு உறுப்பினர்கள் தெரிவித்துள்ளனர்.
மேலும் காணாமல் போனவர்களின் சரியான எண்ணிக்கை தெரியவில்லை. இதையடுத்து நிலச்சரிவு ஏற்பட்டதில் காணாமல் போனவர்களை தேடுதல் மற்றும் மீட்பு பணிகள் தீவிரமாக நடைபெற்று வருகிறது. இந்த நிலையில் நிலச்சரிவில் சிக்கி இறந்த 3 பேரின் உடல்கள் இன்று கண்டுபிடிக்கப்பட்டுள்ளது. கண்டுபிடிக்கப்பட்ட 3 உடல்களும் ஆண்கள் என்று தெரிவிக்கப்பட்டுள்ளது. மேலும் மியான்மர் நாட்டில் உலகின் மிகப்பெரிய சுரங்கங்கள் உள்ள நிலையில், அங்கு பல ஆண்டுகளாக ஏராளமான விபத்துகள் நிகழ்ந்து வருகின்றன.