இலங்கையில் முடக்கப்பட்டுள்ள சமூக வலைத்தள சேவை மீண்டும் பயன்பாட்டிற்கு வந்தது என அந்த நாட்டின் தொழில் நுட்ப அமைச்சகம் அறிவித்துள்ளது.
இலங்கையில் பேஸ்புக், ட்விட்டர், வாட்ஸ் அப், வைபர், யூடியுப் போன்ற செயலிகள் நேற்று நள்ளிரவு முதல் இயங்கவில்லை என சர்வதேச அளவில் இணைய செயல்பாடுகளை கண்காணிக்கும் NetBlocks நிறுவனம் உறுதி செய்திருக்கிறது. ஏற்கனவே இலங்கையில் ஏற்பட்டு வரும் கடும் பொருளாதார நெருக்கடியால் மக்கள் ராஜபக்சே சகோதரர்கள் அரசிலிருந்து வெளியேற வேண்டும் என கூறி போராட்டத்தில் ஈடுபட்டு வருகின்றனர். மேலும் ராணுவ வாகனம் எரிப்பு போன்ற வன்முறை சம்பவங்களும் அரங்கேறி வருகிறது.
இந்நிலையில் இன்று மிகப்பெரிய போராட்டம் நடத்துவதற்கு மக்கள் அழைப்பு விடுத்திருந்த நிலையில், இலங்கை முழுவதும் ஊரடங்கு அமல்படுத்தப்பட்டு இருக்கிறது. இது தொடர்பாக இலங்கை அரசு வெளியிட்டுள்ள அரசிதழில், நேற்று மாலை 6 மணி முதல் திங்கட்கிழமை காலை 6 மணி வரை ஊரடங்கு அமலில் இருக்கும் என அந்நாட்டு அதிபர் கோட்டபய ராஜபக்ஷ கூறியிருக்கிறார்.
இலங்கையில் சுற்றுலாத்துறை முடக்கம் மற்றும் பணவீக்கம் போன்ற காரணங்களால் இலங்கையில் விலைவாசி கடுமையாக உயர்ந்துள்ள நிலையில், அத்தியாவசியப் பொருட்களுக்கும் தட்டுப்பாடு ஏற்பட்டிருக்கிறது. பால், மாவு போன்ற உணவு பொருட்கள் பெட்ரோல் மற்றும் டீசல், சமையல் எரிவாயு கிடைக்காத நிலை ஏற்பட்டுள்ளது. இதனோடு 13 மணி நேர மின்வெட்டும் அறிவிக்கப்பட்டிருக்கிறது.