தமிழ் சினிமாவில் பிரபல நடிகரான சூர்யா நடித்த ஜெய்பீம், சூரரைப்போற்று உள்ளிட்ட திரைப்படங்கள் சர்வதேச அளவில் கவனம் பெற்றது. மேலும் பல விருதுகளையும் வென்றது. அதனை தொடர்ந்து நடிகர் சூர்யா, இயக்குனர் பாண்டிராஜ் இயக்கத்தில் “எதற்கும் துணிந்தவன்” படத்தில் நடித்துள்ளார். மார்ச் 10ஆம் தேதி அன்று இந்த படம் திரையரங்கில் வெளியாக உள்ளது. இந்த நிலையில் புதிய தகவல் ஒன்று வெளியாகியுள்ளது. அதாவது, சூர்யா மற்றும் பாலா இணையும் படம் உறுதியாகியுள்ளது.
சூர்யாவின் 2டி என்டர்டெயின்மென்ட் நிறுவனம் இந்த படத்தை தயாரிக்க உள்ளதாக தகவல் வெளியாகியுள்ளது. பிகில், மேயாதமான் உள்ளிட்ட படங்களில் அருமையான நடிப்பை வெளிப்படுத்தியுள்ள நடிகை இந்துஜா ரவிச்சந்திரன் இந்த படத்தில் சூர்யாவின் தங்கையாக நடிக்க உள்ளார். அதேபோல் சூர்யா வாய் பேச முடியாத, காது கேட்காத மாற்றுத்திறனாளி கதாபாத்திரத்தில் இந்த படத்தில் நடிக்க உள்ளதாகவும் தகவல் கிடைத்துள்ளது. சூர்யா, இயக்குனர் பாலாவுடன் இணைந்து பிதாமகன், நந்தா உள்ளிட்ட படங்களில் பணியாற்றியுள்ளார்.