தமிழக முழுவதும் சென்னை உள்பட 21 மாநகராட்சிகள், 138 நகராட்சிகள், 490 பேரூராட்சிகள் என்று மொத்தமாக 649 நகர்ப்புற உள்ளாட்சிகளுக்கு இன்று (பிப்.19) நகர்ப்புற உள்ளாட்சித் தேர்தல் ஒரே கட்டமாக நடைபெறும் என்று அரசு அறிவித்துள்ளது. அந்த வகையில் தமிழகத்தில் உள்ள மொத்தம் 12,838 வார்டுகளுக்கு ஒரே கட்டமாக இன்று தேர்தல் நடைபெறுகிறது. இதற்கான வாக்கு எண்ணிக்கை பிப்ரவரி 22-ஆம் தேதி நடைபெறும் என்று தெரிவிக்கப்பட்டுள்ளது. மேலும் மேயர் பதவிக்கான தேர்தல் மார்ச் 2 ஆம் தேதி நடைபெற இருக்கிறது.
இந்த நிலையில் தமிழகம் முழுவதும் இன்று (பிப்.19) காலை 7 மணி அளவில் தொடங்கிய வாக்குப்பதிவு மாலை 6 மணி வரை நடைபெற உள்ளது. அதில் அனைத்து வாக்காளர்களுக்கும் காலை 7 மணி முதல் மாலை 5 மணி வரையும், கொரோனா நோயாளிகளுக்கு மாலை 5 மணி முதல் 6 மணி வரை ஒரு மணி நேரமும் அனுமதி வழங்கப்படும் என்று தேர்தல் ஆணையம் தெரிவித்துள்ளது. இந்நிலையில் கோவை மாவட்டத்தில் உள்ள சித்தாபுதூர் வாக்குச்சாவடி மையத்தில் 85 வயது மூதாட்டி சுப்புலட்சுமி முதல் ஆளாக வந்து வாக்கு பதிவு செய்துள்ளார். இன்னும் சற்று நேரத்தில் நடிகர் விஜய் வாக்குப்பதிவுக்கு கிளம்ப உள்ளதாக தகவல் வெளியாகியுள்ளது.