மொபட் மீது அரசு பேருந்து மோதிய விபத்தில் 3 பேர் உயிரிழந்த சம்பவம் பரபரப்பை ஏற்படுத்தியுள்ளது.
கடலூர் மாவட்டத்தில் உள்ள மருதத்தூர் கிராமத்தில் மாணிக்கம் என்பவர் வசித்து வருகிறார். இவருக்கு விவசாயியான கருப்புசாமி என்ற மகன் இருந்துள்ளார். இந்நிலையில் கருப்புசாமி தனது மனைவி செல்வராணி, உறவினர் ஆறுமுகம், விஜய் ஆகியோருடன் ஒரு மொபட்டில் பூலாம்பாடி நோக்கி சென்று கொண்டிருந்தார். இந்நிலையில் ஏ. அகரம் அருகில் சென்று கொண்டிருந்தபோது அவ்வழியாக வேகமாக வந்த தனியார் பேருந்து மொபட் மீது பயங்கரமாக மோதியது. இந்த விபத்தில் தூக்கி வீசப்பட்ட கருப்புசாமி, ஆறுமுகம் ஆகிய இருவரும் சம்பவ இடத்திலேயே பரிதாபமாக உயிரிழந்துவிட்டனர்.
இதனையடுத்து படுகாயமடைந்த செல்வராணி மற்றும் விஜய் ஆகியோரை அருகில் உள்ளவர்கள் மீட்டு அரசு மருத்துவமனைக்கு சிகிச்சைக்காக அனுப்பி வைத்துள்ளனர். இதுகுறித்து தகவல் அறிந்த காவல்துறையினர் சம்பவ இடத்திற்கு விரைந்து சென்று கருப்புசாமி மற்றும் ஆறுமுகம் ஆகியோரின் சடலங்களை கைப்பற்றி அரசு மருத்துவமனைக்கு பிரேத பரிசோதனைக்காக அனுப்பி வைத்துள்ளனர். மேலும் இதுகுறித்து வழக்குப்பதிவு செய்த காவல்துறையினர் தீவிர விசாரணை மேற்கொண்டு வருகின்றனர்.