மோட்டார் சைக்கிள் மீது கார் மோதிய விபத்தில் கல்லூரி மாணவி பலியான சம்பவம் சோகத்தை ஏற்படுத்தியுள்ளது.
திருச்சி மாவட்டத்தில் உள்ள எல்.ஐ.சி காலனியில் குலோத்துங்கன் என்பவர் வசித்து வருகிறார். இவருக்கு ஆண்ட்ரியா என்ற மகள் இருந்துள்ளார். இவரும் உறவினரான நெல்சன் பிரிட்டோ என்பவரும் கோயம்புத்தூரில் இருக்கும் தனியார் கல்லூரியில் படித்து வருகின்றனர். இந்நிலையில் ஈஸ்டர் பண்டிகையை கொண்டாடுவதற்காக நெல்சன் மற்றும் ஆண்ட்ரியா ஆகிய இருவரும் மோட்டார் சைக்கிளில் கோயம்புத்தூரில் இருந்து திருச்சிக்கு சென்று கொண்டிருந்தனர். இவர்கள் கரூர் மாவட்டத்திலுள்ள லாலாப்பேட்டை அருகே சென்று கொண்டிருந்த போது நாகராஜன் என்பவர் ஓட்டி சென்ற கார் மோட்டார் சைக்கிள் மீது பயங்கரமாக மோதியது.
இந்த விபத்தில் படுகாயமடைந்த ஆண்ட்ரியா சம்பவ இடத்திலேயே பரிதாபமாக இறந்துவிட்டார். இதனை அடுத்து உயிருக்கு போராடி கொண்டிருந்த நெல்சனை அருகில் உள்ளவர்கள் மீட்டு மருத்துவமனைக்கு சிகிச்சைக்காக அனுப்பி வைத்தனர். இதுகுறித்து தகவல் அறிந்த காவல்துறையினர் சம்பவ இடத்திற்கு விரைந்து சென்ற இளம் பெண்ணின் சடலத்தை மீட்டு பிரேத பரிசோதனைக்காக அனுப்பி வைத்துள்ளனர். மேலும் இதுகுறித்து வழக்குப்பதிவு செய்த காவல்துறையினர் விசாரணை மேற்கொண்டு வருகின்றனர்.