மோட்டார் சைக்கிள் மீது வேன் மோதிய விபத்தில் கல்லூரி மாணவர் உயிரிழந்த சம்பவம் சோகத்தை ஏற்படுத்தியுள்ளது.
ஈரோடு மாவட்டத்தில் உள்ள புதுக்குய்யனூர் பகுதியில் ஜீவா என்பவர் வசித்து வந்துள்ளார். இவர் அப்பகுதியில் இருக்கும் கல்லூரியில் 3-ஆம் ஆண்டு படித்து வந்துள்ளார். இந்நிலையில் ஜீவா தனது நண்பரான செந்தில் என்பவரோடு மோட்டார் சைக்கிளில் கல்லூரிக்கு புறப்பட்டுள்ளார். இந்த மோட்டார் சைக்கிளை செந்தில் ஓட்டி சென்றுள்ளார். இந்நிலையில் வெள்ளியம்பாளையம் பிரிவு அருகே சென்று கொண்டிருந்த போது எதிரே வேகமாக வந்த வேன் செந்தில் ஓட்டி சென்ற மோட்டார் சைக்கிள் மீது பயங்கரமாக மோதியது. இந்த விபத்தில் தூக்கி வீசப்பட்டு படுகாயமடைந்த ஜீவா சம்பவ இடத்திலேயே துடிதுடித்து இறந்துவிட்டார்.
இதனை பார்த்து அதிர்ச்சி அடைந்த பொதுமக்கள் படுகாயமடைந்த செந்திலை மீட்டு மருத்துவமனைக்கு சிகிச்சைக்காக அனுப்பி வைத்துள்ளனர். இதுகுறித்து தகவல் அறிந்த காவல்துறையினர் சம்பவ இடத்திற்கு விரைந்து சென்று ஜீவாவின் சடலத்தை கைப்பற்றி அரசு மருத்துவமனைக்கு பிரேத பரிசோதனைக்காக அனுப்பி வைத்துள்ளனர். மேலும் இதுகுறித்து வழக்குப்பதிவு செய்த காவல்துறையினர் வேன் ஓட்டுனரான அருள் என்பவரை கைது செய்து விசாரணை மேற்கொண்டு வருகின்றனர்.