நடிகர் ரஜினி நடிப்பில் பி.வாசு இயக்கத்தில் வெளியாகி சூப்பர்ஹிட்டான திரைப்படம் சந்திரமுகி ஆகும். இப்படத்தின் 2ம் பாகத்தை எடுக்க சில வருடங்களாகவே வாசு முயற்சித்து வந்தார். எனினும் ரஜினி 2ம் பாகத்தில் நடிக்க விருப்பம் தெரிவிக்கவில்லை. இதன் காரணமாக 2ஆம் பாகத்தை வேறு ஹீரோக்களை வைத்து எடுக்க முயன்று வந்தார். இதையடுத்து 17 ஆண்டுகளுக்கு பின் இந்த படத்தின் அதிகாரப்பூர்வ அறிவிப்பு அண்மையில் வெளியாகியது. இத்திரைப்படம் “சந்திரமுகி 2” என்ற பெயரில் பிரமாண்டமாக உருவாகிறது. பி.வாசு இயக்கும் இந்த படத்தில் ராகவாலாரன்ஸ் கதாநாயகனாக நடிக்க இருக்கிறார்.
முக்கியமான கதாபாத்திரத்தில் வடிவேலு நடிக்கிறார். லைகா நிறுவனமானது இந்த படத்தினை தயாரிக்கவுள்ளது. இந்த படத்திற்கு எம்.எம் கீரவாணி இசையமைக்கிறார். இதற்குரிய அதிகாரப்பூர்வ அறிவிப்பு அண்மையில் வெளியானது. இந்தநிலையில் சந்திரமுகி-2 படத்தின் படப்பிடிப்பானது இன்று மைசூரில் துவங்கவுள்ளது. அதனை தொடர்ந்து ராகவாலாரன்ஸ், ரஜினியை நேரில் சந்தித்து அவரிடம் ஆசிபெற்றுள்ளார். இந்த புகைப்படங்களை தன்னுடைய சமூகவலைதளப்பக்கத்தில் பகிர்ந்துள்ளார். தற்போது இந்த புகைப்படங்களானது வைரலாகி வருகிறது.
