தூத்துக்குடியில் கடந்த 2018 ஆம் ஆண்டு ஸ்டெர்லைட் ஆலையை எதிர்த்து நடைபெற்ற போராட்டத்தின் போது துப்பாக்கிச் சூடு நடத்தப்பட்டது. அதில் 13 பேர் பரிதாபமாக சுட்டுக்கொல்லப்பட்டனர். மேலும் போராட்டத்தில் பங்கேற்ற பலரையும் காவல்துறையினர் கைது செய்தனர். நூற்றுக்கணக்கான நபர்கள் மீது வழக்குப்பதிவு செய்யப்பட்டது பெரும் அதிர்வலைகளை ஏற்படுத்தியது. இதனையடுத்து அந்த வழக்குகளை ரத்து செய்ய வேண்டும் என்று அப்பகுதி மக்கள் தமிழக அரசுக்கு தொடர்ந்து கோரிக்கையை முன்வைத்து வந்தனர்.
இந்நிலையில் ஸ்டெர்லைட் ஆலைக்கு எதிரான போராட்டத்தில் பதிவான வழக்குகளில் தேவையற்ற வழக்குகள் ரத்து செய்யப்படுவதாக தமிழக அரசு அறிவித்துள்ளது. மத்திய குற்றப் புலனாய்வுத் துறை வசம் உள்ள வழக்குகள், பொது, தனியார் சொத்துக்களுக்கு சேதம் ஏற்படுத்தியதாக பதிவான வழக்குகள் மற்றும் உச்ச நீதிமன்றத்தில் நிலுவையில் இருக்கும் வழக்குகள் ஆகிய சில வழக்குகள் தவிர மற்றவை வாபஸ் பெறப்படும் என கூறியுள்ளது.
இதனையடுத்து ஸ்டெர்லைட் வழக்கில் காவல்துறையினரால் கைது செய்யப்பட்டு காயம் மற்றும் மன உளைச்சலுக்கு ஆளான 93 பேருக்கு தலா ஒரு லட்சம் நிதி வழங்கப்படும். மற்றொரு நபர் வேறு வழக்கில் கைதாகி சிறையில் இறந்து விட்டதால் அவரது குடும்பத்திற்கு 2 லட்சம் நிதி வழங்கப்படும் என கூறியுள்ளது.