ஆளும் கட்சி உறுப்பினர்கள் சட்டமன்றத்தில் போராட்டத்தில் ஈடுபட்டுள்ள சம்பவம் பெரும் பரபரப்பை ஏற்படுத்தியுள்ளது.
டெல்லியில் துணைநிலை ஆளுநராக வி.கே சக்சேனா என்பவர் இருக்கிறார். இவர் கடந்த 2016-ம் ஆண்டு காதி கிராம தொழில் ஆணையத்தின் தலைவராக இருந்தார். அப்போது பண மதிப்பிழப்பு நடவடிக்கை நடந்தபோதுசக்சேனா 1400 கோடி ரூபாய் கருப்பு பணத்தை வெள்ளைப்பணமாக மாற்றியதாக புகார் எழுந்தது. இது தொடர்பாக சிபிஐ விசாரணை நடத்த வேண்டும் என ஆளும் ஆம் ஆத்மி கட்சியினர் சட்டமன்றத்தில் போராட்டத்தில் ஈடுபட்டுள்ளனர். இது தொடர்பாக ஆளும் கட்சியின் சட்டமன்ற உறுப்பினர் துர்கேஷ் பதக் கூறியதாவது,
ஆளுநரை பதவி விலக வலியுறுத்தியும், கருப்பு பணத்தை வெள்ளை பணமாக மாற்றியது தொடர்பாக சிபிஐ விசாரணை நடத்த வேண்டும் எனவும் வலியுறுத்தி போராட்டத்தில் ஈடுபட்டுள்ளோம். அதோடு பணம் மோசடி செய்தவருக்கு ஆளுநராக இருப்பதற்கே தகுதி கிடையாது என்றும், ஆளுநர் பதவி விலகும் வரை போராட்டம் தொடரும் எனவும் கூறினார். மேலும் டெல்லி துணை முதல்வர் மீது சிபிஐ மோசடி வழக்கு பதிவு செய்து விசாரணை நடத்தும்போது, பண மோசடி செய்த ஆளுநர் மீது மட்டும் சிபிஐ விசாரணை நடத்தாது ஏன் எனவும் ஆளும் கட்சியினர் கேள்வி எழுப்பி வருகின்றனர்.