வாலிபர் 2 1/2 லட்ச ரூபாய்க்கு நாணயங்களை கொடுத்து புதிய இரு சக்கர வாகனத்தை வாங்கிய சம்பவம் ஆச்சரியத்தை ஏற்படுத்தியுள்ளது.
சேலம் மாவட்டத்திலுள்ள அம்மாபேட்டை பகுதியில் பி.சி.ஏ பட்டதாரியான பூபதி என்பவர் வசித்து வருகிறார். இவர் சேமிப்பின் முக்கியத்துவம் குறித்து விழிப்புணர்வை ஏற்படுத்தும் வகையில் 2 லட்சத்து 60 ஆயிரம் ரூபாய் பணத்தை ஒரு ரூபாய் நாணயங்களாக மாற்றியுள்ளார். அதன்பிறகு அந்த நாணயங்களை ஒரு மூட்டையில் கட்டி கொண்டு பூபதி புதிய மோட்டார்சைக்கிள் ஒன்றை வாங்கியுள்ளார். அந்த ஒரு ரூபாய் நாணயங்கள் ஷோரூமில் மலைபோல் குவிந்து கிடப்பதை பார்த்து ஊழியர்கள் அதிர்ச்சி அடைந்தனர்.
இது குறித்து பூபதி கூறும்போது, கடந்த மூன்று மாதங்களாக சேலம் மற்றும் சுற்று வட்டார பகுதியில் இருக்கும் வங்கிகள், மளிகை கடைகள் மற்றும் டீ கடைகள் என பல்வேறு இடங்களில் இருந்து ஒரு ரூபாய் நாணயங்களை சேமித்தேன். தற்போது அந்த 2 லட்சத்து 60 ஆயிரம் ரூபாய் மதிப்புள்ள ஒரு ரூபாய் நாணயங்களை கொடுத்து மோட்டார் சைக்கிளை வாங்கியதாக பூபதி தெரிவித்துள்ளார்.