தமிழகம் முழுவதும் 2650 கோடி ரூபாய் மதிப்பிலான ஊராட்சி மன்றங்களின் சாலை மேம்பாட்டு டெண்டர்களை ரத்து செய்து சென்னை உயர்நீதிமன்றம் உத்தரவிட்டுள்ளது.
மத்திய அரசின் 14-வது நிதிக் குழுவின் பரிந்துரையின் பேரில் ஒவ்வொரு மாநிலத்திற்கும் நிதி ஒதுக்கீடு செய்யப்பட்டு அந்த நிதி ஒவ்வொரு ஊராட்சிக்கும் பகிர்ந்தளிக்கப்பட்டு வருகிறது. இந்த நிலையில் திருவாரூர் மாவட்டம், மன்னார்குடி ஊராட்சி ஒன்றியத்தை சேர்ந்த ஜோதிமணி குமரேசன் உள்ளிட்ட ஊராட்சி மன்ற தலைவர்கள் சென்னை உயர்நீதிமன்றத்தில் வழக்கு தொடர்ந்து இருந்தனர். ஊராட்சி மன்றம் மற்றும் கிராம சபையின் ஒப்புதல் இன்றி அரசியலமைப்பு சட்டத்திற்கு விரோதமாக தமிழக அரசு அதிகாரிகள் மூலமாகவே திட்டங்களை தேர்ந்தெடுத்து செயல்பட உள்ளதாகவும் இதனை ரத்து செய்ய வேண்டுமென அந்த மனுவில் கோரிக்கை விடுத்தனர்.
இந்த வழக்கு நீதிபதிகள் திரு. ஆனந்த் வெங்கடேஷ் முன்பு இன்று விசாரணைக்கு வந்த போது ஊராட்சி மன்றங்கள் முடிவெடுத்து அதன் அடிப்படையில் டெண்டர் விட வேண்டும் என மனுதாரர் சார்பில் வாதிடப்பட்டது. இதனையடுத்து ஊராட்சி மன்றங்களில் அனுமதி இல்லாமல் ஊரக வளர்ச்சி துறை அதிகாரிகள் மூலமாகவே டெண்டர் வெளியிடுவதற்கான அறிவிப்பு ஆணையை நீதிபதி ரத்து செய்து உத்தரவிட்டார்.