ரேஷன் கடை அருகே டீக்கடை ஊழியர் உயிரிழந்து கிடந்த சம்பவம் அப்பகுதியில் பெரும் பரபரப்பை ஏற்படுத்தியுள்ளது.
நாமக்கல் மாவட்டம் நல்லூர் பகுதியில் உள்ள ரேஷன் கடை அருகே 50 வயது மதிக்கத்தக்க ஆண் ஒருவர் உயிரிழந்து பிணமாக கிடந்துள்ளார். இதனை பார்த்த அப்பகுதியினர் உடனடியாக நல்லூர் காவல்துறையினருக்கு தகவல் தெரிவித்துள்ளனர். தகவல் அறிந்து சம்பவ இடத்திற்கு விரைந்து சென்ற காவல்துறையினர் அந்த நபரின் உடலை மீட்டு உடற்கூறு ஆய்வுக்காக திருச்செங்கோடு அரசு மருத்துவமனைக்கு அனுப்பி வைத்துள்ளனர்.
மேலும் இதுகுறித்து வழக்கு பதிவு செய்து நடத்திய விசாரணையில் உயிரிழந்து கிடந்த நபர் கரூர் மாவட்டம் குளித்தலை பகுதியை சேர்ந்த ஜஹாங்கீர் உசேன் என்பது தெரியவந்துள்ளது. இதனையடுத்து திருமணமாகாத இவர் பல்வேறு டீ கடைகளில் பணியாற்றி அதில் கிடைக்கும் வருமானத்தில் வசித்து வந்ததாக கூறப்படுகிறது. இந்நிலையில் காவல்துறையினர் அவரது உறவினர்களுக்கு தகவல் தெரிவித்து தீவிர விசாரணை நடத்தி வருகின்றனர்.